Ráđđehus áigu sihkkarastit kommersiála álbmotsáddehaga olggobealde Oslo

Kulturministtar Linda Hofstad Helleland bidjá odne ovdan stuoradiggedieđáhusa “Kommersiála álbmotsáddehat”. Dieđáhusas ráđđehusa áigumuš lea addit buhtadusa ovtta aktevrii mii galgá viidáset fievrredit kommersiála álbmotsáddehaga oanehis áigái.

Meld. St. 14 (2016–2017) Kommersiell allmennkringkasting

Stuoradiggedieđáhus konkludere dainna ahte lea eahpesihkar deavdá go márkan ieš okto kommersiála álbmotsáddehaga mediapolitihkalaš mihttomeriid. Ráđđehus áigu dan danne addit buhtadusa ovtta aktevrii, mii lea ásahuvvon olggobealde Oslo. Maŋŋil go Stuoradiggi lea gieđahallan dieđáhusa áigu departemeanta nu fargga go vejolaš almmuhit šiehtadusa mii bistá 5 jagi.

- Ráđđehus áŋgiruššá sihkkarastit máŋggabealat media. Mii dárbbašit kommersiála álbmotsáddehaga mii birge ja sáhttá leat duohta gilvaleaddjin NRK:i. Mediamáŋggabealatvuhtii lea maid deaŧalaš ahte mis lea okta kanála man váldobáiki lea olggobealde Oslo, dadjá kulturministtar Linda Hofstad Helleland. 

Ráđđehus áigu addit buhtadusa 15 miljovnna euro rádjái (sullii 135 miljovnna ruvnno) ovtta aktevrii. Doarjja juolluduvvo maŋŋil rabas almmuheami. Earret eará gáibiduvvo beaivválaš ođassáddagat, fálaldagat mánáide ja nuoraide ja gaskkustit dárogiel filbma- ja tv-drámá. Prográmmat galget gaskkustuvvot sihke lineáralaččat ja eahpe-lineáralaččat.

- Stáhta lea aktiivvalaččat láhčán dili kommersiála álbmotsáddehahkii fargga 25 jagi, molsašuddi buhtadusaiguin. Otná mediamárkan gáibida ođastit dáid stáhtalaš gaskaomiid. Dat dahká ahte lea dárbu almmolaš doarjagii go galgá viidáset fievrredit kommersiála álbmotsáddehaga tv:s oanehit áigái. Almmolaš doarjaga haga lea várra ahte šaddá heajut mediamáŋggabealatvuohta, dadjá kulturministtar Linda Hofstad Helleland.

Doaibma sihkkarastit kommersiála álbmotsáddehaga lea gaskaboddosaš doaibma. Go Mediašláddjivuođalávdegotti NAČ lea leamaš gulaskuddamis, áigu ráđđehus addit Stuoradiggái obbalaš árvvoštallama olles mediapolitihkalaš gaskaoapmeapparáhtas.