Rámma ådå Hábmerij ja ådå Áhkánjárggaj le dal sajenis

Suohkan- ja ådåsmahttemdepartemænnta le uddni mierredam namáv ja gåggu suohkanrádjá galggá liehket gaskan ådå Hábmera ja ådå Áhkánjárga suohkana. – Mij lip stuorra dættov biedjam stuorrudahkaj ja resurssadilláj, javllá suohkan- ja ådåsmahttemminisstar Monica Mæland.

Njuolgadustjállaga, ma mierredi duola dagu ådå suohkannamájt, ja rádjámierredibme le tjuovos Stuorradikke mærrádusás biehtsemáno 8. biejve 2017. Dalloj mierreduváj Divtasvuona suohkanav Nordlándan juohket guovte sadjáj. Nuorttalulle guovlov Áhkánjárga ja Bálága sujohkanijda, ja oarjjealle guovlov Hábmera suohkanij.

Dan guovte ådå suohkanij namá sjaddi Áhkánjárga suohkan ja Hábmera suohkan.

Mierreduvvam suohkanrádjá dan guovte ådå suohkanij gaskan sjaddá alternatijvva D Nordlánda Fylkamánne tjielggidusán.

– Miján le vuodulasj prosæssa læhkám, ja lip oadtjum moadda oajvvadusá gåggu dat ådå suohkanrádjá bierri liehket. Mij lip dal mærrádusáv dahkam mij gåbttjå dajt måttijt vieledusájt ássje hárráj viehka buoragit, javllá suohkan- ja ådåsmahttemminisstar Monica Mæland.

Tjáhtjefábmoásadus Slabávuonan

Mærrádusá milta sjaddá Nordkraft AS tjáhtjefábmoásadus Slabávuonan ja Slabávuona Bieggafábmoásadus mij le ásaduvvamin, oassen ådå Hábmera suohkanis.

– Mij lip stuorra dættov biedjam stuorrudahkaj, resurssadilláj dajn ådå suohkanijn, ja vuojnnam dárbov nanostuhttet ådå Hábmera suohkanav, javllá Monica Mæland.

– Duodden le departemænnta vieledam Sámedikke árvustallamav gåktu sáme berustimijt huksat, javllá stáhtaráde.

Sámegiela háldadimguovllo

Ráddidus le aj uddni mierredam ådå Hábmera suohkan sjaddá sámegiela háldadimguovlo suohkanin ádåjakmáno 1. biejve rájes jagen 2020.

Uddni le Divtasvuona suohkan ájnna julevsáme suohkan sámegiela háldadimguovlon. Divtasvuodna ja Hábmer libá ájggomussjiehtadusá baktu sihtam sámegiela háldadimguovlo suohkanin sjaddat gå oasse Divtasvuonas ja Hábmer avta suohkanin sjaddaba.

– Mujna l ájggomus tjårggit julevsámij giellarievtesvuodajt. Danen le ájnas ådå Hábmera suohkan sjaddá oassen sámegiela háldadimguovlos dalloj gå Divtasvuona suohkan gáhtu jagen 2020, javllá suohkan- ja ådåsmahttemminisstar Monica Mæland.

Departemænnta sihtá aj, aktan Sámedikkijn, álgadit ságastallamijt suohkanij gávnatjit buorre tjoavddusijt julevsámij hárráj Divtasvuona nuorttalulle bielen.

– Sáme giellaaddne e galga nievrep dilláj boahtet suohkanådåstusá maŋŋela, javllá Mæland.

Julevsámegiella le giella mij le garrasit ájtedum. Valla dáj maŋemus jagij le gielladille åvddånam buorebuj guovlluj. Muhtem sáme giellaguoradallam vuoset jut ienebu nuorajs uddni julevsámegielav adni gå majt æjgátbuolvva anij. 

Sámegiela háldadimguovlon libá sámegiella ja dárogiella jæbddásasj giela. Dakkár suohkanijn le divnajda riektá duostoduvvat sámegielajn gå guládalli guovlo almulasj etáhtaj. Viesádijn li aj stuoráp rievtesvuoda åhpadussaj sámegielan ja sámegiellaj.

Suohkan- ja ådåsmahttemdepartementa præssatelefåvnnå: 22 24 25 00

Bajás