Stáhtabušeahtta 2018

Ráđđehus nanne searvadahttima: Ođđa rávvenortnet nuoraide geat vásihit negatiivvalaš sosiála goziheami, ja 23 miljovnna bargui gealbudahttindoaimmaide

Ráđđehus evttoha jagi 2018 bušeahtas juolludit 2 miljovnna ruvnnu rávvenortnegii hehttet nuoraid vásiheames negatiivvalaš sosiála goziheami, gudnái gullevaš veahkaválddi ja bággonáitima.

– Olbmot geat vásihit negatiivvalaš sosiála goziheami, gudnái gullevaš veahkaválddi ja bággonáitima galget oažžut doarjaga. Ráđđehus áigu ge ásahit ođđa rávvenortnega sin várás geat háliidit botket oktavuođaid bearrašiin ja fierpmádagain, cealká sisafárren- ja searvadahttinministtar Sylvi Listhaug (OB).

Ráđđehus nanne gealbudahttindoaimmaid vai eambbogat besset bargui ja dat lea oassi searvadahttinbarggus

Bargui gealbudahttindoaimmat galget leat ulbmillaččat ja beaktilat. Ráđđehus evttoha juolludit oktiibuot 23,2 miljovnna ruvnnu nannet bargui gealbudahttindoaimmaid.

Ráđđehus evttoha ahte dáid ruđain galgá 6,7 miljovnna ruvnnu geavahuvvot geatnegahttojuvvon oahpahussii maid dorvoohccit geat ásset vuostáiváldinbáikkiin fertejit čađahit.

– Lea dehálaš ahte gealbudahttindoaimmat álggahuvvojit nu johtilit go vejolaš. Geatnegahttojuvvon dárogieloahpahus ja oahpahus norgga kultuvrra ja norgga árvvuid birra, addá čielga signálaid dan birra, dadjá sisafárren- ja searvadahttinministtar Sylvi Listhaug.

Dárogielmáhttu lea mearrideaddji juohkehažžii gii oassálastá bargoeallimis dahje viidáset oahpus. Ráđđehus evttoha 2,9 miljovnna ruvnnu gealbudahttit dárogiel oahpaheddjiid 2018:s. Suohkanat gos leat vuostáiváldinbáikkit ja guoskevaš suohkanat galget vuoruhuvvot.

Jearru dárogiel geahččalemiide rávis sisafárrejeddjiid várás lassána dađis. Ráđđehus evttoha várret 7,6 miljovnna ruvnnu suohkaniidda vai besset geahččalemiid čađahit dávjjibut. Dan lassin áigu ráđđehus fállat almmolaš dárogielgeahččaleami alit gielladásis (C1), ja evttoha várret 6 miljovnna ruvnnu dan doibmii.