Boazodoallošiehtadallamat: 213 miljovnna ruvdnosaš fálaldatrámma
Ođas | Almmustahtton: 26.01.2024 | Maŋimuš ođasmahttojuvvon: 29.01.2024 | Eanadoallo- ja biebmodepartemeanta
Stáhta šiehtadallanlávdegoddi lea odne ovdanbuktán iežas fálaldaga 2024/2025 Boazodoallošiehtadusa šiehtadallamiid oktavuođas. Fálaldaga rámma lea 213 miljovnna ruvnno, mii lea 13 miljovnna ruvnno eambbo go dálá šiehtadus.
Stáhta šiehtadallanlávdegotti váldovuoruheamit leat:
- Njuolggodoarjja
- Dálkkádatheiveheapmi
- Boazodoalloareálaid áimmahuššan
- Gearggusvuohta
Stáhta šiehtadallanlávdegoddi áigu láhčit dili dasa ahte joatkit ja nannet barggu ovddidit boazodoalu ceavzilis ealáhussan, ja joatkit vuoruhit sin geain boazodoallu lea váldodoaibman.
Stáhta šiehtadallanlávdegoddi evttoha joatkit njuolggodoarjagiiguin. Evttohuvvo lasihit orohatdoarjaga, earret eará nannen dihte orohagaid barggu čuovvulit areálaáššiid. Várrejuvvojit maiddái ruđat doarjjan orohatplánaid ođasmahttimii.
Dálkkádatrievdamat mielddisbuktet hástalusaid boazoealáhussii, ja earret eará šaddá eambbo dárbu rievdadit ja divodit áiddiid ja gárddiid. Stáhta šiehtadallanlávdegoddi evttoha eará ládje geavahit dálá šiehtadusa, mii lasihivččii friddja ruđaid Boazodoalu ovddidanfoanddas ja mii attášii vejolašvuođa vuoruhit infrastrukturdoaibmabijuid. Vai mii buorebut nagodit dustet boahttevaš guohtunroasuid, de evttoha Stáhta šiehtadallanlávdegoddi nannet gearggusvuođafoandda 12 milj. ruvnnuin.
Leat čađahuvvon guokte golmmajagáš pilohtaprošeavtta boazodoallošiehtadusa bokte, namalassii pilohtaprošeakta Norgga Boazosápmelaččaid Riikkasearvvi ráđđeaddibálvalusa várás areálaáššiin ja nubbi lea pilohtaprošeakta Boazodearvvašvuođabálvalusa várás Veterinearainstituhta bokte. Stáhta šiehtadallanlávdegoddi evttoha dahkat dáid bálvalusaid bistevažžan ja lasihit ruđaid areálaáššiid ráđđeaddibálvalussii nu ahte ráđđeaddit sáhtáše veahkehit eambbo orohagaid.
Bohccobiergomárkan lea guhkit áiggi badjel ovdánan positiivvalaččat. Sihkkarastin dihte bohccobierggu sajádaga márkanis, de vuoruhuvvojit ruđat Bohccobierggu márkanlávdegoddái. Dasa lassin jotkojuvvojit lasseealáhusaid áŋgiruššamat Ovddidanprográmma ja oahppo- ja fuolahusvuđot bálvalusaid bokte.
– Fálaldat mii odne lea ovddiduvvon lea hui buorre fálaldat, ja biddjojuvvo vuođđun viidáset šiehtadallamiidda, dadjá šiehtadallanjođiheaddji Viil Søyland.
Šiehtadallamat galget loahpahuvvot ovdal njukčamánu 1. beaivvi.
