Ođđasat

Sii geain leat golbma boahkkodosa eai dárbbaš váldit pcr-iskosa

Dát sisdoallu lea eanet go 1 jagi boaris. Danne sáhttet dieđut leat boarásmuvvan.

Dearvvašvuođa- ja fuolahusministtar Ingvild Kjerkol dahká vejolažžan dan ahte sii geat leat váldán golbma boahkkodosa dahje leat váldán guokte dosa ja lea leamašan koronadávda maŋemus golbma mánu siste, eai dárbbaš váldit duođašteaddji pcr-iskosa. Dat mearkkaša ahte go dát olbmot ožžot positiivvalaš iešiskosa, de sii eai dárbbaš boahtit iskkusstašuvdnii. Seammás lea sávahahtti ahte sii atnet suohkanlaš čovdosiid registreret iešiskosiid. Rievdama duogáš lea dat ahte njoammun lassána sakka ja lea hástaleaddjin suohkaniid iskankapasitehtii.

-Mii siđaimet Dearvvašvuođadirektoráhta ja Álbmotdearvvašvuođainstituhta árvvoštallat iskanvuogádaga ođđajagimánu 20. b., ja das lei áigemearri odne ođđajagimánu 21. b. Vástádusa mielde lea čielggas ahte dál sáhttit dahkat nu ahte sii geat leat ožžon golbma boahkkodosa dahje leat ožžon guokte dosa ja lea leamašan korona golbma maŋemus mánu siste, eai dárbbaš váldit pcr-iskosa duođaštan dihte bohtosa.

Etáhtaid vástádusa vuođul lean mun sihtan Dearvvašvuođadirektoráhta ja Álbmotdearvvašvuođainstituhta jođánit gulahallat suohkaniiguin ja ođasmahttit daid ávžžuhusaid ahte geaidda galget duođašteaddji pcr-iskosat fállojuvvot, dadjá dearvvašvuođa- ja fuolahusministtar Ingvild Kjerkol.

Measta 2,5 miljovnna leat ollen váldit goalmmát dosa. Dasa lassin bohtet vel sii geat leat ožžon guokte dosa ja geain lea leamašan koronadávda golbma maŋemus mánu siste. Dat dahká stuora oasi álbmogis, ja rievdadus helpe suohkaniid. Dán jovkui ii mearkkaš rievdadus maidege koronasertifikáhta stáhtusii, dan dihte go sii lohkkojuvvojit juo ollásit boahkuhuvvon.

-Mun háliidan ahte mii gávdnat čovdosiid mat helpejit suohkaniid, dadjá Kjerkol. Buohkat geat ožžot positiivvalaš iešiskosiid, ávžžuhuvvojit registreret dan suohkana čovdosii. Dát iešregistreren lea dehálaš vai dearvvašvuođaeiseválddit ain sáhttet gozihit njoammundili. Dál lea 132 suohkanis dakkár čoavddus, mii gokčá oktiibuot 4 miljovnna ássi. KS boahtá fargga fállat sullasaš čovdosa daid suohkaniidda main ii leat dakkár, ja dan barggu galgá Dearvvašvuođadirektoráhtta čuovvulit.