Studeanttat leat duhtavaččat geabbilis oahppofálaldagaiguin
Preassadieđáhus | Almmustahtton: 19.12.2022 | Maŋimuš ođasmahttojuvvon: 20.01.2023 | Máhttodepartemeanta
85 proseantta geabbilis ja lávdaduvvon oahppofálaldagaid studeanttain leat duhtavaččat fágalaš sisdoaluin, čájeha ođđa raporta. Oahppofálaldagat deivet bures bargoeallima dárbbuide ja láhčet oahpu ja lassigelbbolašvuođa olbmuide sin orrunbáikkiide ja iešguđetlágan eallindiliide.
– Oahppofálaldagat eai galgga leat dušše ollesáigestudeanttaide, geat sáhttet guhkit áigge studeret oahpposajis. Ráđđehus lea nannen oahppofálaldaga báikkiin, main ii leat fágaskuvla, allaskuvla iige universiteahtta. Mun lean danin movtta oaidnit, ahte fálaldagat vástidit bures studeanttaid dárbbuide ja vuordámušaide, dadjá dutkan- ja alit oahpu ministtar Ola Borten Moe.
Geabbilvuohta mávssolaš
Studeanttat servet geabbilis oahppofálaldagaide earret eará, go dárbbašit ovttastahttit oahpu bargguin, báhcit orrut ruovttubáikái ja go sis lea fuolahanovddasvástádus. 69 proseantta almmuhedje, ahte sii eai livčče váldán olles oahpu, jos dat ii livčče fállon geabbilis oahppofálaldahkan.
– Oahpu geabbilvuohta lea mávssolaš, vai olahit olbmuid, geat iešguđet sivaid geažil eai sáhte studeret ollesáiggis oahppobáikkis. Ollu čujuha dasa, ahte ortnet geasuha studeanttaid, geat muđui eai livčče studeren, erenoamážit sin, geat leat jo barggus. Dat lea mávssolaš, vai miehtá riikka sihkkarastit doarvái olbmuid, geain lea rievttes gelbbolašvuohta bargoeallimii, dadjá Borten Moe.
Maiddái oahppoásahusat albmanahttet, ahte sii geabbilis oahppofálaldagaid bokte olahit stuorát oasi vejolaš studeantahivvodagas, erenoamážit sin geat leat vehá boarrásabbot, geat leat ásaiduvvan, bearašluvvan ja leat jo barggus.
Relevánta bargoeallimii
Ortnega rámiidit das ahte lea relevánta bargoeallimii. 47 proseantta studeanttain vástidit ahte oahppu lei hui ávkkálaš dahje áibbas vealtameahttun bargui.
2023 giđa ráđđehus ovdanbuktá stuorradiggedieđáhusa, mainna kártejit bargoeallima gelbbolašvuođadárbbu. – Jáhkán ahte geabbilis oahppu ja oahpahusa heiveheapmi leat vealtameahttumat, vai mii nagodit gokčat bargo- ja servodateallima gelbbolašvuođadárbbu boahtteáiggis. Dasa mii máhccat dieđáhusas, dadjá Borten Moe.
Geabbilis ja lávdaduvvon oahpu birra
Universiteahtat, allaskuvllat ja fágaskuvllat leat 2018 rájes sáhttán ohcat doarjaga geabbilis oahppofálaldagaid ovddideapmái ja ásaheapmái. Geabbilis oahppofálaldagaide gullet lávdaduvvon oahppoprográmmat ja neahttaoahput, ja dain oahpahus ii lágiduvvo oahppoásahusas. Lávdaduvvon oahppoprográmmaid oahpahusas studeanttat čoahkkanit fysalaččat čuovvut oahpahusa eará sadjái go campusii. Neahttaoahpahusa prográmmain fas fállet buhtes neahttaoahpahusa dahje ovttastahttet dan fysalaš čoahkkanemiide. Ortnega hálddaša Alit oahpu ja gelbbolašvuođa direktoráhtta.
2023 stáhtabušeahtas ráđđehus lasiha geabbilis ja lávdaduvvon oahpuid juolludeami 12,6 miljovnnain kruvnnuin, nu ahte dat šaddá oktiibuot 199,6 miljovnna kruvnno.