Doarjja veahkehit guohtunroasus
Ođas | Almmustahtton: 28.01.2022 | Maŋimuš ođasmahttojuvvon: 03.02.2022 | Eanadoallo- ja biebmodepartemeanta
Boazodoalu šiehtadusbealit leat boahtán ovttaoaiviliidda heahtegearggusvuođafoandda geavaheami birra. Ráhppojuvvo juolludit doarjaga kr. 4,50 juohke bohcco nammii juohke jándora daidda orohagaide main lea roassu.
Duogáš lea ahte dál lea guohtunroassu osiin Romssa ja Finnmárkku fylkkas ja Nordlánddas. Roasu sivva leat lássejuvvon eatnamat, go lea jiekŋa eatnama nalde ja olu muohta. Eará guovlluin ja orohagain lea maid gáibideaddji guohtundilli, muhto ii leat vuos guohtunroassu.
Ovdalaš vásáhusaid vuođul lea ásahuvvon vuogádat gieđahallat guohtunroasuid boazodoalus. Dán vuogádagas lea gearggusvuođalávdegoddi juhke guohtunguovllus mii čađaha geahčademiid, árvvoštallet guohtuneatnamiid, ja celket guohtunroasu go lea dakkár dilli. Dasa lassin juolluda vuogádat ruđaid čađahan dihte doaibmabijuid sihkkarastit elliidčálggu ja boahttevaš buvttadeami. Dat boahtá lassin daid ruđaide maid orohagat ieža várrejit iežaset gearggusvuođafoanddaide. Go gearggusvuođalávdegoddi lea duođaštan ahte lea guohtunroassu, de šaddá vejolažžan atnit orohagaid iežaset gearggusvuođafoanddaid, ja dasto maid vejolažžan ohcat doarjaga guovddáš heahtegearggusvuođafoanddas.
Šiehtadusbealit leat šiehtta ahte stáhtahálddašeaddji sáhttá juolludit 4,50 ruvnno juohke bohcco nammii juohke jándora daidda orohagaide main lea guohtunroassu, ja orohagat galget hálddašit daid ruđaid sihkkarastin dihte elliidčálggu ja boahttevaš buvttadeami.
Lea boazodoallošiehtadus mii ruhtada dan guovddáš heahtegearggusvuođafoandda. Šiehtadusbealit leat odne čoahkkinastán digaštallan dihte movt dán heahtegearggusvuođafoandda buoremus lági mielde sáhttá atnit dálá dilis. Šiehtadusbealit leat ovttaoaivilis ortnega birra mii láhčá diliid dasa ahte boazodoallit sáhttet oastit ja fievrredit fuođđariid.
Eanandoallo- ja biebmodepartemeanta áigu álggos nannet ođđa láhkaásahusa erenoamáš juolludeami birra heahtegearggusvuhtii mas atnet šiehtadusbeliid ovttaoaivilvuođa vuođđun.