Sámi ulbmilat 2022 bušeahtas

Ráđđehus evttoha juolludit 60 miljovnna kruvnno ođđa viesu huksemii Beaivváš sámi našunálateáhtera ja Sámi joatkkaskuvlla ja boazodoalloskuvlla várás. Viessu gárvána 2024.

– Mii leat hui movtta go ovttasbarggus Kulturdepartemeanttain ja Máhttodepartemeanttain sáhttit bidjat johtui sámi našunálateáhtera ja ođđa sámi joatkkaskuvlla huksema 2022, dadjá guovlo- ja digitaliserenministtar Linda Hofstad Helleland.

Sámedikki juolludeami maid lasihit bušeahttaevttohusas 6 miljovnnain kruvnnuin, mainna čuovvulit stuorradiggedieđáhusa sámi servodagaid ealáhusvuođu birra. Dainna Sámediggi beassá ovddidit molssaevttolaš sámi ealáhusvugiid ovttas eará gaskaoapmeaktevrraiguin. Sámediggái evttohit maid juolludit 7,3 miljovnna kruvnno lasi, mainna mákset láiggu Saemien Sijte  - máttasámi musea ja kulturguovddáža ođđa museaviesu ovddas, mii gárvána juovlamánus 2021.

Boazodoallošiehtadussii juolludit 15 miljovnna kruvnno eambo go diibmá, mii lea sullii 10 proseantta, stáhtabušeahtas 2021/2022. Dat vástida lasáhusa, mii juolluduvvui 2020/2021 boazodoallošiehtadussii.

Ráđđehus evttoha maid juolludit 5 milj. kruvnno sierra mánáidviessofálaldaga álggaheapmái, mii lea heivehuvvon sámi váimmusguovlluid mánáide.

– Ráđđehus oaidná mávssolažžan láhčit dili dasa, ahte sáhttit ovttasbargat sámi beroštumiiguin, ja nu ásahit buriid doaimmaid sámi servodahkii 2022 ja das ovddos guvlui. Dat vuhtto das, ahte ollislaš juolludeamit sámi ulbmiliidda leat ovdánan máŋga jagi, dadjá Helleland.

Ollislaš logahallan bušeahttaáššiin, mat gusket sámi ulbmiliidda, gávdno neahttasiiddus regjeringen.no, ja maiddái čállosis Bevilgninger til samiske formål i statsbudsjettet 2022 (Juolludeamit sámi ulbmiliidda 2022 stáhtabušeahtas).