Presideantagalledeapmi: Norga lea válmmaš siehtadallagoahtit gávpesoahpamuša Ruoššain

 

Go Ruošša vuosttaš várrestáhtaministtar Zubkov deaivvadii ealáhus- ja gávpeministariin Trond Giskein iđitbeaivvi, de son gulai dan ođđasa ahte Norga lea válmmaš šiehtadallagoahtit ruoššaiguin gávpesoahpamuša.

– Ruošša lea jo dehálaš riika Norgga gávppašeapmái.  Beroškeahttái finánsaroasus dagai Norgga ekspoarta Ruššii diibmá oktiibuot 5,8 miljárdda ruvnno. Dat lea guovtte geardái jagi 2003 buohkanis gávppašansumi ektui. Min riikka ja Ruošša gaskasaš gávppašansoahpamuš áttášii vel buoret eavttuid gávppašit, cealká Giske.

EFTA ja Ruošša čađahedje jo jagi 2008 oktasaš ovdaguorahallama mii rávve álggahit šiehtadallamiid. Ruoššat leat dan rájes ásahan tuollolihtu Beloruoššain ja Kasahstánain, ja leat dáhtton dakkár šiehtadallamiid maidda buot golbma riikka servet.

– Mii leat árjjalaččat bargan máŋga jagi gávnnahan dihtii eavttuid álggahit barggu siehtadusain. Ráđđehus lea čielggadan ahte lea vejolaš viiddidit soahpamuša nu ahte dat guoská buot tuollolihtu riikkaide, ja dat mearkkaša ahte mii sáhttit vuolláičállit šiehtadusa mii fátmmasta Beloruošša ja Kasahstána ge, dadjá Giske.

Seammalágan čielggadeami lea dárbbašlaš čađahit juohke EFTA-riikkas ovdalgo šiehtadallamat sáhttet álggahuvvot dan golmma riikkas main ásset oktiibuot 165 milj. olbmo.  

– Dain lea hirpmus stuorra gávpemárkan Norgii. Ovdamearkka dihtii leat Norgga fitnodagain máhtolašvuohta ja stuorra gávppálaš beroštumit energiijasuorggis mat berrejit beroštahttit Kasahstána, cealká Giske.  

Iđitbeaivvi čoahkkimis guktot bealit deattauheigga oktasaš beroštumi nannet Norgga ja Ruošša gaskasaš gávpeoktavuođaid nu ahte dain leat ovddalgihtii vuorddehahtti rámat.  

Duohtadieđut:

• Ruošša ja Norga gávppašeigga jagi 2009 buuohkanassii 12 milliárdda ruvnno ovddas.
• Beloruošša ja Norga gávppašeigga jagi 2008 sullii 1,17 milliárdda ruvnno ovddas, ja Norgga ekspoarta Kasahstánii seamma jagi lei 3,56 milliárdda ruvnno ja impoarta lei 83 millj. ruvnno.
• Norga galgá jođihit EFTA šiehtadallamiid Ruoššain, Beloruoššain ja Kasahstánain.
• Ii Ruošša, ii Kasahstána iige Beloruošša leat loahpahan iežaset šiehtadallamiid beassat WTO-lahttun. Norgga bealis biddjojuvvo vuođđun ahte Ruošša ja eará riikkat tuollolihtus galget leat  WTO-lahtut ovdalgo vejolaš gávpešiehtadus EFTAin vuolláičállojuvvo.