Stáhta fállá boazodollui 102 miljovnna

Stáhta šiehtadallanlávdegoddi lea odne almmustahttán boazodoallošiehtadusa fálaldagas. Stáhta šiehtadallanlávdegoddi árvala šiehtadusa rámman 102,0 miljovnna kruvnno, mii vástida dálá soahpamuša viidodahkii.

• Loga Stáhta boazodoallošiehtadusa fálaldaga (pdf, 12 Mb) 

Fálaldaga oktavuođas galgá fuomášit, ahte boazodoallogeasus rievdaduvvo 2012. Boazodoallu beassá maid geahpedit sisaboahtti lassiárvodivada, mii fakturerejuvvo boazodoalloorohagaide go sii háhket oktasaš áiddiid ja rusttegiid.

Lasihit njuovvama ja bohccobierggu vuovdima
2012/2013 boazodoallošiehtadusa fálaldagas Stáhta deattuha erenoamážit doaimmaid, maiguin sáhttá lasihit bohccobierggu njuovvama ja vuovdima. Vuoruhit maid doaimmaid, maiguin johtilit čuovvulit Eanandoallo- ja biebmodieđáhusa. Fálaldat movttiidahttá boazodoalu buvttadit márkana várás ja ovddidit árvoráhkadeami, dan láhkai fálaldat lea erenoamážit láhččojuvvon badjeolbmuide, geain boazodoallu lea váldoealáhussan.

- Dán fálaldaga vuođul ealáhussii lea álkit bargagoahtit dan guvlui, ahte lasihit njuovvama ja bohccobierggu vuovdima. Lea mávssolaš máhcahit boazodollui nana dili márkaniid ektui. Dan barggus lea mávssolaš bálddalastit boazodoallošiehtadusa resurssaid, nu ahte beaktileamos lági mielde juksat mearriduvvon ulbmiliid, dadjala Anne Marie Glosli, guhte lea Stáhta šiehtadallamiid jođiheaddji.