Ođđa viessoláigodoarjja daidda láigoássiide geat láigohit muddejuvvon orohagaid dahje ásodagaid Troanddimis

Ovdal soađi mannosaš orohagaid dahje ásodagaid viessoláigomudden heaittihuvvui ođđajagi molsašumis. Rievdaduvvon nationálabušeahtas evttoha Ráđđehus ođđa viessoláigodoarjaga daidda láigoássiide guđet eai nákce máksit oktasaš viessoláigguid dakkár orrunvisttiin Troanddimis. Doarjja juolluduvvo dárbbu árvvoštallama vuođul.

– Ii leat sávahahtti ahte vuorrasat olbmot geain lea váttes ruhtadilli, galget bággejuvvot fárret eará orrunsadjái go viessoláigu lassána. Danne mii leat ráhkadan ortnega mii dahká eatnašiidda vejolažžan ain orrut dakkár láigovisttiin, cealká gielda- ja guovloministtar Liv Signe Navarsete.

Troanddima suohkan ja stáhta juogadit doarjjagoluid 50 proseanttain goabbáge. Jahkái 2009 lea doarjjadárbu Troanddimis rehkenastojuvvon oktiibuot beallemiljovnna ruvdnui. Stáhta lea jo ásahan dakkár ortnega Oslo suohkaniin.

 Doarjjaortnet lea daid láigoássiid várás geat devde 67 jagi ovdal ođđajagemánu 1. b. 2010 dahje geat ásse muddejuvvon ásodagas jo ovdal ođđajagemánu 1. b. 1990. 

Maŋŋágo doarjja lea máksojuvvon, galgá ortnet sihkkarastit ahte ovttaskas olbmuide báhcá 7.000 ruvnno. Párrii galgá báhcit 11.000 ruvnno. Daidda bearrašiidda  main leat golbma bearašlahtu dahje eanet bearašlahtut, juolluduvvo vel lassin 2.500 ruvnno juohke olbmui. Addojuvvo maiddái 500 ruvnno mánnui liggema buhtadassan. Doarjja ii addojuvvo dan láigooassái mii lea stuorát go 11.000 ruvnno mánnui. Opmodatrádjá lea biddjojuvvon 250.000 ruvdnui.

Troanddima suohkan dat galgá hálddašit ortnega. 

Gielda- ja guovlodepartemeantta preassatelefovdna: 22 24 25 00.