Nanosmahttojuvvon árvobuvttadeapmi várreguovlluin

Gielda- ja guovlodepartemeanta juolluda 10 miljovnna kruvnnu nannet árvobuvttadeami ja ealáhusovdáneami várreguovlluin. Guovddážis dán barggus lea gealbo- ja fierpmádathuksen, jođiheapmi ja ođđajurddašeapmi.

- Dáinna vuoruhemiin mii háliidat geavahit árvobuvttadanvejolašvuođaid mat leat čadnon várreresurssaide, cealká gielda- ja guovloministtar Liv Signe Navarsete.

Østlandsforskning lea Gielda- ja guovlodepartemeantta dáhtu mielde mearridan dihto várreguovlluid. Unnimusat 50 proseantta gieldda areálas galgá dakkár guovllus mii lea badjel 700 mbm. (600 mbm. Davvi-Trøndelagas).  Dán mearrádusa vuođul leat de 77 gieldda Lulli- ja Gaska-Norggas mat leat várreguovlluin.

Oppland fylkkagielda oažžu bargun hálddašit ruđaid. Hálddašeapmi galgá čađahuvvot lagas ovttasbargguin eará várreguovlluid fylkkagielddaiguin, várregielddaiguin, fylkkamánniin ja earáiguin. Lea maid lunddolaš vuordit ahte dás šaddá buorre gulahallan ealáhusaid ovddasteddjiiguin  ja dehálaš beroštusorganisašuvnnaiguin.

Oppland fylkkagielddas barget árjjálaččat ovddidit várreguovlluid beroštumiid. Dan sii dahket viiddis fágalaš ovttasbarggus, maiddái fylkkarájáid rastá. Sis lea maid guovddáš doaibma Fjellregionsamarbeidet nammasaš fierpmádagas , mii lea politihkalaš ovttasbargofierpmádat  fylkkagielddaid, guovloráđi ja ovttaskas gielddaid gaskka mat leat dáid várreguovlluin.

- Mii oaivvildat danne ahte Oppland fylkkagielddas lea buorre vuođđu dán barggu hálddašit ja nu  ovddidit várreguovlluide ollislaš árvobuvttadeami ja ovttasbarggu,  dadjá Liv Signe Navarsete.

Gielda- ja guovlodepartemeanta áigu dán barggu birra maŋŋelis čilget sierra juolludanreives Oppland fylkkagildii.

Gielda- ja guovlodepartemeantta preassatelefovdna: 22 24 25 00.