Suvddemgirdde báhtsá guhkebut Afghanistanan

Suvddemgirdde mij Vuonan le ISAF-operasjåvnån báhtsá Afghanistanaj gålmmå máno guhkebut, gitta snjilltjamáno 1. bæjvváj 2013.

Suodjalusminisstar Anne-Grete Strøm-Erichsen ja suodjalusoajvve Harald Sunde bådijga Mazar-e Sharifaj Kabulas vuona Hercules-girdijn mij dálla báhtsá gålmmå máno guhkebut. Dánna guovte soahteålmmåj gudi girdev tjuovojga. (Kim Gulbrandsen, Forsvaret)

Suvddemgirdde lij dåjman Afghanistanan 2012 gålgådismáno 1. biejve rájes. Álgo rájes galggin dåppe liehket guhtta máno, ja jut vejulasj lij guhkedit gålmmå máno vil. Dálla le mierredum suvddemgirdde, mij le Hercules C130J, galggá operasjåvnnåj oassálasstet gitta snjilltjamáno 1. biejve 2013.

- Suvddemgirdde le viehka ájnas ja bivnos oasse ISAF-operasjåvnås. Dat vijdet kapasitehtav jåhtet sihke ulmutjijt ja dárbbagijt jåhtelit ja sihkarit. Sæmmi båttå le girden ájnas roalla dálla gå ISAF hiebat ietjas ja dárbaj suvddet ålov åvddål sjielvvi sijddasuvddem, javllá suodjalusminisstar Anne-Grete Strøm-Erichsen.

Girdde ja bargge li stasjoneridum Mazar-e Sharifan, ja viehkedi ISAF-operasjåvnåv ålles Afghanistanan - ij dåssju vuona soahteålmmåjt.

Soahteålmmåj boahtteájgge
Vuona soahteålmmå Afghanistanan galggi 2013:n guovten sajen liehket: Mazar- e Sharif ja Kabul. Ienemus oasse sijájs galggi Mazar-e Sharifan liehket, gånnå Vuodna duola dagu galggá nuorttarijkaj politijahárjjidallevehkaj oassálasstet. Sierrapolitijaj hárjjidallam Kabulan joarkká.

Dálla besa vuojnnet makkir soahteålmmå Vuonan li Afghanistanan boahtte jage:
http://www.regjeringen.no/nb/dep/fd/aktuelt/nyheter/2012/norske-styrker-i-afghanistan-i-2013.html?id=704820