Rigmor Aasrud Ássiidiskkadallama birra:
- Duhtavaš geavaheaddjit, muhto almmolaš eiseválddit sáhttet šaddat čeahpibun
Historjjálaš arkiiva
Almmustahttináigodat Regjeringen Stoltenberg II
Almmustahtti: Ođasmahttin-, hálddahus- ja girkodepartemeanta
Preassadieđáhus | Nr: 03/2010 | Almmustahtton: 14.01.2010
86 proseantta Norgga ássiin oaivvildit ahte min riika lea dakkár riika man buoret eallin- ja ássanriika measta ii oppa sáhte leat ge. Dát boahtá ovdan Ássiidiskkadallamis mii mihtida ássiid duhtavašvuođa gielddalaš, fylkkagielddalaš ja stáhtalaš bálvalusaide.
86 proseantta Norgga ássiin oaivvildit ahte min riika lea dakkár riika man buoret eallin- ja ássanriika measta ii oppa sáhte leat ge. Mii leat maiddái duhtavaččat almmolaš bálvalusaide. Duhtavaččamusat mii leat ovdamearkka dihtii álbmogirjerádjui, Viidnemonopolii ja allaskuvlafálaldagaide. Eanemusat duhtameahttumat mii leat earret eará plána- ja huksenkontuvrii, NSBii ja NAVii. Dát boahtá ovdan Ássiidiskkadallamis mii mihtida ássiid duhtavašvuođa gielddalaš, fylkkagielddalaš ja stáhtalaš bálvalusaide.
- Ássiid iskkadallan addá dehálaš dieđuid gielddaide, fylkkagielddaide ja stáhtii. Mii dárbbašit dákkár iskkadallamiid oaidnin dihtii dan mii ii leat buorre ja vai mii sáhttit riekta áŋgiruššat ja buoridit bálvalusaid geavaheaddjiidasamet, cealká ođasmahttin-, hálddahus- ja girkoministtar Rigmor Aasrud.
Ássiidiskkadallan čájeha ahte 94 proseantta ássiin leat duhtavaččat dahje erenoamáš duhtavaččat ássat ja eallit Norggas. Measta seamma olus, 89 proseantta ássiin, leat duhtavaččat dan gildii mas sii ásset. Sullii čiežas logi ássis leat duhtavaččat gielddalaš ja stáhtalaš bálvalusaide. Unnit oassi go logi proseantta ássin leat duhtameahttumat.
- Mun lean hui ilus go ássit lea duhtavaččat sihke báikkálaš ja stáhtalaš bálvalusfálaldagaide. Dát čájeha ahte sii guđet addet bálvalusaid dábálaččat barget buori barggu sihkkarasttiidettiineaset iežaset bálvalusaid kvalitehta ja heivvolašvuođa vuostáiváldiide. Seammás iskkadallan oidnosii buktá ahte arvat surggiin ja doaimmahusain leat vejolašvuođat buoridit bálvalusaideaset, dadjá sier Rigmor Aasrud.
Ássit oaivvildit ahte almmolaš doaimmahusat dábálaččat čuvvot lágaid ja njuolggadusaid ja gieđahallet olbmuid árvvusatnimiin. Seammás oaivvildit olus ahte lea váttis fáhtet rivttes olbmo ságaide hálddahusas, ja eanebut go bealli mis oaivvildit ahte almmolaš eiseváldiit ja ásahusat skievttidit resurssaid.
- Duođalaš ášši lea dat ahte ássit áddejit almmolaš resursageavaheami dán láhkai. Okta dain deháleamos hástalusain stáhtii boahttevaš jagiid lea oažžut nu ollu ávkki go vejolaš dain ruđain mat geavahuvvojit. Ovttasráđiid finánsaministariin ja ráđđehusain muđuid mun áiggun vuoruhit dan ovddos guvlui, cealká ođasmahttinministtar.
Ássiidiskkadallan lea stuorámus nationála iskkadallan mii goassege lea čađahuvvon iskan dihtii olbmuid duhtavašvuođa almmolaš bálvalusain. Ráđđehus háliida ahte bohtosat galget almmuhuvvot. Buot dieđuid ja gráfaid lea vejolaš lástet dás: www.difi.no ja geavahit fas. Vejolaš lea maid ieš guorahallat diehtomateriála.
Synovate lea čađahan iskkadallama IKTa ja hálddahusa direktoráhta ja Ođasmahttin-, hálddahus- ja girkodepartemeantta ovddas. Ássiidiskkadallama nubbi oassi galgá čađahuvvot 2010 vuosttas jahkebealis. Iskkadallama nubbi oassi galgá gávnnahit guđege bálvalusa geavaheaddjiid oaiviliid.