Finnmárkkulága ovdahistorjjá dáhpáhusat

Finnmárkkulága barggu duogážin lea dárbu čielggadit stáhta gaskavuođa sámi álbmogii, ja dohkkehit sámiid vuoigatvuođa geavahit ja ávkkástallat luondduvalljodagaid sin iežaset kultuvrra mielde.

Dát dáhpáhusat sámerievtti ovdáneamis dahket vuđđosa Finnmárkkulága bargui:

• Riidu Álttá- Guovdageainnu-eanu dulvadeamis 1980
• Sámi vuoigatvuođalávdegoddi nammaduvvui 1980
• Sámediggi ásahuvvui sámelága geassemánu 12. 1987 bokte
• Vuođđolága § 110 a sámiid birra mearriduvvui miessemánu 27. 1988
• Sámi vuoigatvuođalávdegoddi ovdanbuvttii čielggadusas NAČ 1997: 4 Sámi kultuvrra luondduvuođus ođđajagemánus 1997
• Ráđđehus bijai ovdan evttohusas finnmárkkulága birra Od.prp. nr. 53 (2002–2003) cuoŋomanu 4. 2003
• Stuorradiggi mearridii Finnmárkkulága miessemánu 24. 2005 (Odeldiggi) ja geassemánu 8.2005 (Láhkadiggi) ja Gonagas nannii («sankšonerii») dan stáhtaráđis geassemánu 17. 2005

Dan guovtti jagis go Stuorradikki justiisalávdegoddi barggai lágain, doalai lávdegoddi earret eará rabas gullamiid geassemánus 2003 ja oahppalattai Finnmárkku čakčat 2003. Lávdegoddi doalai maiddái njeallje ráđđádallama Sámedikkiin ja Finnmárkku fylkkadikkiin, main ságaškušše ráđđehusa láhkaevttohusas.

Justiisalávdegotti láhkaevttohus sáddejuvvui Sámediggái ja Finnmárkku fylkkadiggái vai buktet cealkámušaid. Ovttajienalaš Sámediggi ja stuorra eanetlohku Finnmárkku fylkkadikkis dorjo justiisalávdegotti láhkaevttohusa, man dasto Stuorradiggi loahpalaččat mearridii.

Almmuhan: 14.09.05