Reviderejuvvon nationálabušeahtta 2014

Norgga oassin Ráđđehus árvala ruhtadit NATO miidnačorgendoaimmaid ja Syria ja Lulli-Sudána militearadoaimmaid 123 miljovnna kruvnnuin. –Norga doarju aktiivvalaččat riikkaidgaskasaš suodjalusdoaimmaid mat buoridit min ja riikkaidgaskasaš sihkkarvuođa ja stáđisvuođa, cealká suodjalusministtar Ine Eriksen Søreide.

Ráđđehus čuovvola ráđđehusvuođustusa ahte juolludit lassiruđa riikkaidgaskasaš ođđa doaimmaide, ja juolluda Suodjalussii 123 miljovnna kruvnnu gokčan dihte lassigoluid dehálaš olgoriikkadoaimmaide maid NATO miidnačorgensoahteveahka ferte čađahit, ja doaimmaide Syrias ja Lulli-Sudanas.  –Mii čájehat ahte Norga johtilit sáhttá veahkehit NATO ja máilmmiservodaga guoskevaš dehálaš doaimmaid, Eriksen Søreide dadjala.

Ráđđehusa árvaluvvon jagi 2014 reviderejuvvon nationálabušeahtta čuovvola maid Suodjalusa  mearriduvvon guhkesáiggiplána 2012-2016 go lasiha juolludusaid Eanansuodjalussii ja Ruovttusuodjalussii (RS) , nugo 55 miljovnna Eanansuodjalussii ja 45 miljovnna Ruovttusuodjalussii. Ruhtadoarjja lea báhcán ruhta go leat heaittiheamen doaimmaid Afghanistánas ja daid ruđaid de vuoruhat eará doaimmaide dán suorggis.

-Ráđđehusa árvalus čuovvu Suodjalusa guhkesáiggeplána, muhto ruhtasirdin dahkko dál árat go leai plánejuvvon. Dat mielddisbuktá ahte mii lasihat suodjalusa doaimmaid dáppe ruovttus árabut go plánejuvvon, dadjá suodjalusministtar Ine Eriksen Søreide. –Ráđđehus sakka vuoruha Suodjalusa doaimmaid maid sii ieža vuoruhit. Ruhtasirdima bokte leat mii mielde ovddideamen Eanansuodjalusa ja Ruovttusuodjalusa, son lasiha.

Ráđđehus áigu maid juolludit Riddobearráigehččui 20 milj. kruvnnu divodit riddobearráigeahččanskiippa KV Andenes maŋŋil go dat jagi 2013 vujii coahkásii.

Ráđđehus lasiha vaháguvvon veteránaid buhtaduspostii 132 milj. kruvnnu dán jagi. Poastta rámma lasihuvvo Stáhta penšuvdnakássa juolludusdárbbuid prognosaid ektui. –Ráđđehus sihkkarastá dáinna lágiin ahte min veteránat ožžot daid buhtadusaid maid sis lea vuoigatvuohta oažžut, dadjala suodjalusministtar.   

Ráđđehus árvala maid joatkit Joint Strike Missile prošeavtta. Ovdal geasi 2014 ovddiduvvo sierra proposišuvdna Stuoradiggái gos prošektii árvaluvvo gollorámma, ja rievdadusat bušehttii.