Teaksta lea ođasmáhtton miessemánu 26. beaivvi 2026.

Sámi vuoigatvuođalávdegoddi 2 lea čielggadan oamastan- ja geavahanvuoigatvuođaid  árbevirolaš sámi guovlluid eatnamiidda ja čáziide Romssa fylkkas ja lulás. Árvalusat gustojit vuosttažettiin Romsii, Nordlándii, Davvi-Trøndeláhkii, Lulli-Trøndeláhkii ja Hedmárkui, muhto muhtin árvalusat gustojit maiddái Finnmárkui.

Čielggadeapmi sisttisdoallá árvalusaid golmma ođđa láhkii:

  • Láhka áššemeannudeami ja ráđđádallamiid birra dakkár doaibmabijuid oktavuođas, mat sáhttet váikkuhit árbevirolaš sámi guovlluid luondduvuđđui (áššemeannudan- ja ráđđádallanláhka).
  • Láhka mii kárte ja dohkkeha dálá vuoigatvuođaid eatnamiidda ja luondduriggodagaide árbevirolaš sámi guovlluin Romssa fylkkas ja lulás (Kárten- ja dohkkehanláhka).
  • Láhka riektediliid ja eatnamiid ja luondduvalljodagaid hálddašeami birra Hålogalándda almennega eatnamiin Nordlánddas ja Romssas (Hålogalandda láhka).

Lávdegoddi maid árvala rievdadit osiid dála lágain, earret eará várrelága, boazodoallolága, ovddeš báktelága, olgonastinlága, ovddeš luonddusuodjalanlága ja ovddeš plána- ja huksenlága.

Oassi lávdegotti árvalusain lea čuovvuluvvon sámi beroštumiid konsultašuvnna njuolggadusaid lágadeami bokte, mii doaibmagođii suoidnemánu 1. beaivvi 2021. Eará lágaid rievdadusaid evttohusat leat čuovvoluvvon sierra proseassaid bokte.

Duogáš
Sámi vuoigatvuođalávdegoddi nammaduvvui vuosttaš geardde 1980:s. 1984:s ovddidii lávdegoddi čielggadeami NOU 1984: 18 Om samenes rettsstilling (sámegillii: NAČ 1984: 18 Sápmelaččaid riektesajádat). Dát čielggadeapmi lei vuođđun sámelága mearrideapmái 1987:s, Sámedikki ásaheapmái, ja vuođđoláhkamearrádussii sámi kultuvrra suodjaleami birra, Vuođđoláhka § 110 a, 1988:s. 1997:s geigii Sámi vuoigatvuođalávdegoddi čielggadeami, man vuođul maŋŋil mearriduvvui Finnmárkoláhka – NOU 1997:4 Naturgrunnlaget for samisk kultur (samegillii: NAČ 1997: 4 Sámi kultuvrra luondduvuođđu). Stuoradiggi mearridii Finnmárkolága 2005:s.

Sámi vuoigatvuođalávdegoddi nammaduvvui fas ođđasit 2001:s. Lávdegoddi galggai “čielggadit sámi álbmoga riektesajádaga go guoská vuoigatvuhtii eatnamiidda ja čáziide sámi geavahanguovlluide lullelis Finnmárkku fylkka”. Dasa lassin galggai lávdegoddi čielggadit historjjálaš dilálašvuođaid ja gustovaš vuoigatvuođaid sámi geavahanguovlluin, ja ovddidit vuođuštuvvon árvalusa makkár rievdadusat sin mielas galggaše leat riektedilálašvuođas.  

Juovlamánu 2007 geigii lávdegoddi čielggadeami Justis- ja politiijadepartementii – NOU 2007: 13 Den nye sameretten (sámegillii: NAČ 2007: 13 Ođđa sámeriekti). Dasa lassin leat lávdegotti duogašdieđut almmuhuvvon sierra NAČ.an – NOU 2007: 14 Samisk naturbruk og rettsituasjon fra Hedmark til Troms (sámegillii: Sámi luonddugeavaheapmi ja riektedilli Hedmárkkus Romsii).