Gii ovddasvástida maid mánáidgárdesuorggis

Lea Máhttodepartemeanta, Oahpahusdirektoráhtta, suohkanat ja Fylkkamánni geain lea ovddasvástádus mánáidgárddiin.

Oahpahusdirektoráhtas lea ovddasvástádus čuovvovaš surggiin:

  • duođaštit ja lađastallat mánáidgárddiid dili
  • ovdánahttit kvaliteahta- ja gelbbolašvuođa mánáidgárdesuorggis
  • doarjagiid- ja njuolggadusaid hálddašit
  • bearráigeahččandoaimmain
  • doaimmahit bagadallama mánáidgárdesuorgái 

Fylkkamánni čađaha mánáidgárdepolitihka stáhtadoarjagiid hálddašeami bakte, doaimmaid mánáidgárdelága olis ja bagadallan suohkaniid. Fylkkamánni koordinere ja initiere ovddidanbargguid suohkaniin ja mánáidgárddiin.

Suohkan mánáidgárdeeiseváldin lea sis ovddasvástádus dohkkehit ja bearráigeahččat mánáidgárddiid mat suohkanis  leat, sihke priváhta ja suohkanlaš. Buot mánáidgárddit galget dohkkehuvvot ovdal go sáhttet doaibmagoahtit. Suohkan dat galgá bearráigeahččat ahte mánáidgárddi doaibma čuovvu daid rámmaid mat leat mearriduvvon dohkkeheami oktavuođas, ahte mánáidgárddi njuolggadusat eai rihko lága ja ahte mánáidgárddi sisdoallu čuovvu lága ja rámmaplána mearrádusaid. Bearráigeahčču mearkkaša maiddái aktiivvalaš bagadallanovddasvástádusa. Lea suohkan mii galgá fuolahit ahte buot dohkkehuvvon mánáidgárddit suohkanis ožžot almmolaš doarjaga dásseárvosaš vuogi mielde. Suohkan galgá máksit mánáidgárddiid dábálaš doaimma man almmolaš doarjja ja váhnenmáksámušaid bakte.

Mánáidgárdeeaiggádiin lea ovddasvástádus daid fálaldagain mat fállojuvvojit juohke ovttaskas mánáidgárddis. Priváhta mánáidgárddiid eaiggáduššet dávjá váhnemat, eaŋkilolbmot, searvvit ja ideála organisašuvnnat. Mánáidgárdeeaiggát mearrida váhnenmáksámuša dási. Mánáidgárddi váhnenráđđi mearrida jahkeplána mii sihkkarastá ahte váhnemat ja bargit besset mielde hábmemis mánáidgárddi pedagogalaš sisdoalu. Mánáidgárdeeaiggádis lea ovddasvástádus virgáibidjat doarvái ja gelbbolaš bargiid. Mánáidgárddi jođiheaddji ja pedagogalaš jođiheaddji galget leat oahppan ovdaskuvlaoahpaheaddjit. Mánáidgárddis galgá leat okta pedagogalaš jođiheaddji juohke 14-18 mánnálogus go mánát leat badjel golmma jahkásaččat ja okta pedagogalaš jođiheaddji juohke 7-9 mánnálogos go mánáidahki lea vuolil golbma jagi. 

Dás sáhtát lohkat eanet mánáidgárddiid lága ja njuolggadusaid birra