Sámi kulturpolitihkka
Artihkal | Maŋimuš ođasmahttojuvvon: 17.09.2021 | Kultur- ja dásseárvodepartemeanta
Gielda- ja ođasmahttindepartemeanttas lea váldoovddasvástádus ovttastahttit stáhtalaš sámepolitihka. Kultur- ja dásseárvodepartemeanta ovddasvástida sámi dáidda- ja kultursuorggi.
Kultur- ja dásseárvodepartemeanta fágalaš ovddasvástádus sámi dáidda- ja kultursuorggis
Kultur- ja dásseárvodepartemeanta lea bajimus ovddasvástádus fuolahit kulturpolitihka Norggas.
Sámepolitihka fievrrideami dáfus leat Norgga eiseválddit daid maŋimuš logijagiid bidjan vuođđun ahte sámiin galgá leat duohta váikkuhanfápmu iežaset áššiin. 2019:s mearriduvvui ođđa bušeahttaortnet mii mearkkaša ahte buot Sámedikki bušeahttapoasttat čohkkejuvvojit ovtta bušeahttapostii Gielda- ja ođasmahttindepartemeanttas. Kultur- ja dásseárvodepartemeantas lea ain suorgeovddasvástádus sámi dáidda- ja kulturpolitihkas.
Kultur- ja dásseárvodepartemeanta fuolaha ráđđehusa sámi kulturpolitihka earret eará sámi kulturviesuid álggahan- ja huksenprošeavttaid vuoruhemiid bokte, ja ruhtajuolludemiid bokte iešguđet sámi kulturdoaimmaide.
Ruhtajuolludeamit juogaduvvojit ee. oktasaš doarjjaortnegiid mielde maid sámi dáiddárat, sámi aviissat, sámi filbma, sámi arkiiva ja sámi valáštallanorganisašuvnnat hálddašit. Dasto hálddašit Kultur- ja dásseárvodepartemeanta doarjaga/juolludusa máŋga vuostáiváldi geat fuolahit sámiide guoski dáidda- ja kulturdoaimmaid ja bargamušaid. Dan dahket ovdamearkka dihtii Nationálagirjerádju, riikkalaš museafierpmádahkii gulli museat, ja Norgga kulturráđđi.
Mii čujuhat Gielda- ja ođasmahttindepartemeantta jahkásaš publikašuvdnii, mas čájehuvvojit buot ruhtajuolludeamit mat mannet sámi ulbmiliidda stáhtabušeahta bokte.
Sámi dáiddárat ja kulturberošteaddjit sáhttet ohcat ruhtadoarjagiid iešguđetlágan doaibmabijuide ja prošeavttaide Sámedikki doarjjaortnegiid bokte, ja maiddái nationála doarjjaortnegiid bokte, ee. Norgga kulturráđis.
Arvat ollu riikkaidgaskasaš konvenšuvnnat unnitloguid ja eamiálbmogiid birra gáhttejit sámi gielaid ja kultuvrra. Gielda- ja ođasmahttindepartemeantta ovddasvástádussii gullá ovttastahttit ráđđehusa barggu Eurohpálaš unnitálbmotgielaid lihtuin, skábmamánu 5.b. 1992, Unnitálbmotgielaid lihttu.