Visuála dáiddasuorgi
Artihkal | Maŋimuš ođasmahttojuvvon: 22.02.2024 | Kultur- ja dásseárvodepartemeanta
Kultur- ja dásseárvodepartemeanta áimmahuššá stáhtalaš áŋgiruššama visuála dáidaga oktavuođas dainna lágiin ahte juolluda ruđaid dáiddamuseaide ja sullasaš ásahusaide. Dasa lassin leat Norgga kulturráđis prošeaktaruđat ja iešguđet doarjjaortnegat visuála dáiddasuorggi dáiddáriid ja lágideddjiid várás.
Ráđđehusa politihka ulbmil dán suorggis lea láhčit dili iešguđetlágán visuála dáiddaovdanbuktimiid buvttadeapmái, seailluheapmái, gaskkusteapmái ja jearaheapmái. Visuála dáidagii gullet sihke dálááiggi dáidagat ja boarrásit dáidagat.
Visuála dáidaga juolludeamit ásahusaide ja doaibmabijuide leat vuođđuduvvon nationála ulbmiliidda ahte váikkuhit rabas, fátmmasteaddji ja girjás kultureallimii miehtá riikka. Nationálamusea ja eará museaid ulbmilat nationála museafierpmádagas leat earret eará nanu máhtolašvuođabuvttadeapmi, áššáiguoskevaš gaskkusteapmi ja ollislaš čoakkáldagaid ovddideapmi.
Visuála dáidagiid čájáhusbáikkit
Kultur- ja dásseárvodepartemeanta juolluda ruđa nationála museafierpmádaga dáiddamuseaide ja máŋgga visuála dáidagiid čájáhusbáikái miehtá riikka, nu go earret eará Bergen Kunsthall, Dáiddáriid Viessu, OCA (Office for Contemporary Art Norway), ja Norgga Govvadáiddárat (Norske Billedkunstnere)/Stáhta Dáiddáčájáhus (Čakčačájáhus). OCA:s lea ovddasvástádus Norgga oassálastimis Venezia-biennalenii ja sin váldobargu lea riikkaidgaskasaš dálááiggi dáidaga lonohallan.
Dáidaga, arkitektuvrra ja design nationálamusea
Nationálamusea lea riikka njunuš ásahus mii čohkke, vurke, duođašta, dutká ja gaskkusta govvadáidaga, dáiddaduoji, designa ja arkitektuvrra.
Ođđa museavisti Vestbanenis Oslos rahppui geassemánu 11. b. 2022. Dat ođđa musea lea dál Davviriikkaid stuorámus dáiddamusea. Rahpama rájes leat ollu olbmot fitnan Nationálamuseas.
Ođđa musea ulbmilin lea oččodit ealli, nationála dutkan- ja gaskkustanguovddáža visuála dáidagiid várás. Musea galgá doaibmat láidesteaddji deaivvadanbáikin gos juohkelágan olbmot galget vásihit ja oažžut dieđuid visuála dáidaga birra, ja ođđa visti galgá čalmmustahttit Nationálamusea čájáhus- ja gaskkustanarenan riikkaidgaskasaš dásis.