Historjjálaš arkiiva

Reviderejuvvon našunálabušeahtta 2018

148 miljovnna ruvnna Svalbardii

Historjjálaš arkiiva

Almmustahttináigodat Solberga ráđđehus

Almmustahtti: Justiisa- ja gearggusvuođadepartemeanta

Ráđđehus evttoha oktiibuot 148 miljovnna ruvnna Svalbardii reviderejuvvon našunálabušeahtas (RNB) 2018. Evttohus lea lassin dan 100 miljovnna ruvdnosaš liigejuolludeapmái Svalbarda globála siepmanvuorkái, maid ráđđehus evttohii njukčamánus ja masa Stuoradiggi lea miehtan.

– Ráđđehussii lea dehálaš mihttomearri doalahit nanu ja bistevaš báikkálaš servodaga Longyearbyenis. Longyearbyen galgá leat geasuheaddji orrunbáiki. Dalle lea dehálaš ahte Longyearbyena ássit maid leat oadjebasat ruovttuineaset, lohká Justiisa-, gearggusvuođa- ja sisafárrenministtar Tor Mikkel Wara (OvB).

Dáinna evttohusain sihkkarastá ráđđehus Gruvedalena ássanprošeavtta ovdáneami. Ráđđehus evttoha maiddái juolludit 70 miljovnna ruvnna vuođđostruktuvrra doaimmaide, mii lea Statsbygg oassi das. Statsbygg huksengoluid ruhtadeapmi sihkkarastojuvvo Statsbygg muddenfoandda atnima bokte. Das lea várrejuvvon 150 miljovnna ruvnna 2018:s ja gitta 141 miljovnna ruvnna rádjái 2019:s.

– Mun lea ilus go Statsbygg dál sáhttá álggahit prošeavtta mas huksejuvvojit 60 ođđa ássanvistti Longyearbyenii, ja plánaid mielde galget vuosttaš ássanvisttiide juo beassat fárret dán jagi. Buorit ja sihkkaris ássanvisttit leat dehálaččat oččodit bargiid stáhta virggiide Svalbardas, lohká gieldda- ja ođasmahttinministtar Monica Mæland (O).

Dasto lea 20 miljovnna ruvnna várrejuvvon Longyearbyena báikestivrra vuođđostruktuvrra bargguide Gruvedalenis. Dasa lassin evttohuvvo várret vel 26 miljovnna ruvnna areálaovddideami bargguide Longyearbyenis.

Ráđđehus evttoha viidáseappot juolludit 25 miljovnna ruvnna RNB 2018:s sihkkarastit Fuolahusvistti Ny-Ålesundas. Dat fitnodat oaččui RNB 2017:s 12 miljovnna ruvnna sihkkarastit Fuolahusvistti geađgejuolggi. Go leat stuora hástalusat maid eará visttiiguin permaduollu váttisvuođaid dihte, de válljii dát fitnodat háhkat eanet konsuleantta árvvoštallamiid. Njukčamánus 2018:s gávnnahedje ahte Fuolahusvistti sihkkarastin gáibida ahte geađgejuolgi ođastuvvo ollislaččat.

– Svalbard-dieđáhus mearrida ahte visttit ja laboratoriat Ny-Ålesundas galget eanet ovttastahttojuvvot, juogaduvvot ja adnojuvvot ovttas. Go dál fuolahusvistti divvojuvvo, de čájeha ráđđehus dan ahte mii čuovvolit dieđáhusa. Mii háliidit nannet norgga doallorolla ja láhčit Ny-Ålesundda ovddasguvlui vuođđun riikkaidgaskasaš luonddudieđalaš dutkanovttasbargguide main lea alla máilmmidássi. Fuolahusvisti lea báikki deháleamos oktasaš deaivvadanbáiki ja guovddážis dán vuođđolávddis, dadjá dálkkádat- ja birasgáhttenministtar Ola Elvestuen (G).