Aktiver Javascript i din nettleser for en bedre opplevelse på regjeringen.no

Reviderejuvvon nationálabušeahtta

Ekonomalaš páhkka valáštallamii ja eaktodáhtolaš suorgái

Dát sisdoallu lea eanet go 4 mánu boaris. Danne sáhttet dieđut leat boarásmuvvan. Ođasmahttojuvvon dieđuid oainnát dás Corona-dilli.

– Valáštallansuorgi lea riikka stuorimus organiserejuvvon fálaldat mánáide ja nuoraide, ja vearditmeahttun bajásšaddanarena. Mánáide ja nuoraide miehtá riikka lea hirbmat dehálaš ahte valáštallansearvvit fas álggahit doaimmaid, dadjá kultur- ja dásseárvoministtar Abid Q. Raja. Mun lean hui duhtavaš go sáhtán almmuhit ahte mii lasihat veahkkedoaimmaid vai valáštallansearvvit mat dárbbašit dietnasiid smávit ja stuorit doaluin cevzet roasu čađa.

– Ollu valáštallansearvvit ja eaktodáhtolaš organisašuvnnat leat áibbas sorjavaččat sisaboađuin maid ožžot básáriid, lahpesgávppiid, kioskagávppašeami, vuojánguođáhagaid geavaheami ja viessoláigguid bokte. Dál viiddidat ja nannet buhtadusortnega 1 miljárdda kruvnnuin, áiddo fal dan dihte ahte buhtadit diekkár dienasmassimiid. Mun jáhkán ahte dat lea stuora ávkin valáštallanjoavkkuide ja servviide miehtá Norgga, dadjá kultur- ja dásseárvoministtar.

Ráđđehus lea álggahan ollu iešguđet doaibmabijuid maid ulbmil lea dustet váttisvuođaid maŋŋil corona-njoammudávdda leavvama Norgii, mii garrasit lea čuohcan fitnodagaide, ovttaskas olbmuide ja organisašuvnnaide.  Buhtadusortnegat valáštallan- ja eaktodáhtolašsuorgái maid ulbmil lei buhtadit goluid heaittihuvvon, maŋiduvvon ja lássejuvvon doaluid oktavuođas galggai álggos dušše buhtadit bileahttadietnasiid ja oassálastinmávssuid áigodagas njukčamánu 5.beaivvi rájes gitta cuoŋománu 30. beaivvi rádjai.  Ortnegii lei várrejuvvon 700 miljovnna kruvnnu. Vuosttaš ohcanvuorus ledje sullii 2300 organisašuvnna ohcan buhtadusaid 370 miljovnna kruvnnu ovddas.

Ráđđehus evttoha reviderejuvvon nationálabušeahtas viiddidit ortnega nu ahte dat buhtada maid massojuvvon dietnasiid go eai beasa vuovdit atnubiergasiid, lágidit básáriid, láigohit organisašuvnna viesuid ja rusttegiid, vuovdit kioskagálvvuid ja eará gálvvuid ja bálvalusaid doaluid oktavuođas. Ortnet rievdaduvvo maid nu ahte dat gusto maiddái doaluide mat heaittihuvvojit gaskaáigásaččat.

Ortnet lea rámmastivrejuvvon ja lea vejolaš ohcat 70 proseantta buhtadusa dienasmassimis.  

Ráđđehus evttoha viiddidit ortnega nu ahte dat galgá gustot olles áigodahkii goas eanaš dáhpáhusaid lágidangielddus lei fámus; njukčamánu 12.beaivvi rájes gitta geassemánu 15.beaivvi 2020 rádjai. Ortnega viiddidemiin lea valáštallan- ja eaktodáhtolašsuorgi ožžon 3 mánus 1 miljárdda kruvnnu.