Ovtta oaivilis boazodoallošiehtadusa hárrái
Ođas | Almmustahtton: 11.02.2022 | Eanadoallo- ja biebmodepartemeanta
Stáhta, Eanandoallo- ja biebmodepartemeantta bokte, ja Norgga boazosápmelaččaid riikkasearvi (NBR) leat odne boahtán ovtta oaivilii 2022/2023 boazodoallošiehtadusa hárrái.
Šiehtadusa rámma lea 180 miljovnna kruvnno, mii lea 15,5 miljovnna kruvnno eanet go dálá šiehtadusas.
2022/2023 boazodoallošiehtadusa váldovuoruheamit leat njuolggodoarjagat, boazodoalu areálaid gáhtten, heivehusat dálkkádahkii ja boazodoalu gearggusvuohta, rekruteren ja infrastruktuvradoaimmat. Vuoruhemiiguin nannejit čielgasit ealáhusa rámmaeavttuid.
– Lean duhtavaš, go dál leat dahkan šiehtadusa Norgga boazosápmelaččaid riikkaservviin, dadjá Sandra Borch. – Eanandoallo- ja biebmoministtarin mu mielas lea mávssolaš sihkkarastit boazodollui buriid rámmaeavttuid ja leat mielde ovddideamen boazodoalu nannosabbon ja ceavzilin. Njuolggodoarjagiid leat lasihan 11 miljovnnain kruvnnuin, nu ahte oktiibuot juolludit 108,7 miljovnna kruvnno njuolggodoarjjan. Mu mielas šiehtadusa bokte láhčet buori dili boazodoalu buvttadeami ja gánnehahttima ovddideapmái, dadjá Borch.
Boazodoalus gártet rievdadit iežaset doaimmaid dálkkádatrievdadusaid geažil, ja badjánit vuorddekeahtes dilit. Go guohtumat jikŋot dávjá, de šaddet liigegolut ja dárbbašuvvojit investeremat. Šiehtadusa oassebealit leat danin ovtta oaivilis orohatdoarjaga lasiheami hárrái, vai lea vejolaš investeret rusttegiidda, maid vehkiin heivehit bargguid dálkkádahkii. Maiddái infrastruktuvradoaimmat laktásit dása, nu mo maiddái roassogearggusvuođa doarjaga lasiheapmi.
Oassebealit leat boahtán ovtta oaivilii dan hárrái, ahte CWD riskka geahpedeami dihte juolluduvvo ovtta háve doarjjan ruhta áldduid njuovvamii 2022/2023 njuovvanáigodagas. Doarjaga ulbmilin lea njuovvat eanet áldduid go dábálaččat.
Šiehtadusa oassebealit leat ovtta oaivilis vuoruhit rekruterendoaimmaid, ja leat danin lasihan álggahandoarjaga 1,7 miljovnnain kruvnnuin. Juolludit 5,2 miljovnna kruvnno álggahandoarjjan. Juolludeami ulbmilin lea doarjut vuollái 35-jahkásaš badjeolbmuid, geat áigot álggahit iežaset siidaoasi. Doarjagiin movttiidahttet maid rievdadit struktuvrraid dan láhkai, ahte siidaosiid sirdet vuollái 35-jahkásaččaide.
– Doarjja lea mávssolaš, vai nuorra searat bargagohtet badjedilis. Lea dábálaš, ahte álggus leat stuorát golut. Doarjaga lasiheapmi álkidahttá nuorra badjeolbmuid bargagoahtit boazodoaluin, dadjá eanandoallo- ja biebmoministtar.