Gielddat fertejit ráhkkanit boahkuhit goalmmát háve buohkaid, geat leat deavdán 45 jagi

Informasjon om koronasituasjonen endrer seg raskt og kan derfor være utdatert. 

Sjekk temasiden Koronasituasjonen for siste nytt fra regjeringen, eller Helsenorge.no for oversikt over råd og regler om koronaviruset på samisk.

Ráđđehus dáhttu gielddaid fállat dievasmahttinboahkuid sidjiide, geat leat deavdán 45 jagi, dan maŋŋá go dan leat fállan buohkaide, geat leat badjel 65 jagi. Maiddái badjel 18-jahkásaččaide, geain leat duođalaš buohcuvuođat, ja buohkaide geat barget dearvvašvuođa- ja fuolahanbálvalusain, fállet dievasmahttinboahkuid.

Ráđđehus mearridii skábmamánu 12. beaivve fállat goalmmát boahkuid badjel 18-jahkásaččaide. Álbmotdearvvašvuođainstituhtta lea dál árvvoštallan mo dan galgá čađahit, ja ráđđehus čuovvu sin ávžžuhusa. Ráhkkanit ain dasa, ahte 18-45 jahkásaččat maid ožžot dievasmahttinboahkuid.

– Lea mávssolaš, ahte gielddat jotket boahkuhemiin olles návccaiguin. Lea mávssoleamos boahkuhit goalmmát háve sin, geat leat badjel 65 jagi, dan maŋŋá fertejit joatkit singuin, geat leat deavdán 45 jagi. Háliidan ahte gielddat dihtet buori áiggis ovddalgihtii mo goalmmát boahkuhemiiguin galget joatkit, nu ahte eai ložžegoađe leavttu, dadjá stáhtaministtar Jonas Gahr Støre.

Eanaš ollásit boahkuhuvvon ollesolbmot, geat eai leat deavdán 65 jagi, leat bures suddjejuvvon duođalaš dávdda vuostá ain jahkebeali nuppiid boahkuid maŋŋá. Go dávda njoammu eanet, de sáhttet dattetge eanebut njoammuduvvot ja buohccát.

– Dávda lea njoammugoahtán eanet, ja dat mielddisbuktá ahte eanebut sáhttet buohccát hejot. Dievasmahttinboahkut korona vuostá suddjejit olbmuid ain buorebut, ja sáhttet hehttet njoammumiid nu ahte dearvvašvuođabálvalusa bargonoađđi ii šatta menddo lossat, dadjá dearvvašvuođa- ja fuolahanministtar Ingvild Kjerkol.

Dievasmahttinboahkuid galget fállat go 6 mánu leat vássán nuppi boahkuheames. Gielddat berrejit vuoruhit vuos sin, geat guhkimustá leat vuordán. Dan láhkai fuolahit, ahte sii geain lea stuorámus dárbu oažžut buoret suoji, vuoruhuvvojit ovddimužžii.

Goalmmát boahkut buohkaide, geat barget dearvvašvuođa- ja fuolahanbálvalusain
Buohkaide, geat barget dearvvašvuođa- ja fuolahanbálvalusain, galget fállat dievasmahttinboahkuid, ii dušše sidjiide, geat barget divššohasaiguin.

– Dan mii dahkat, vai dearvvašvuođa- ja fuolahanbálvalusaid bargit dovdet iežaset oadjebassan, ja vai hehttet dávdda njoammumis. Dan láhkai suddjet divššohasaid buorebut, dadjá Kjerkol.