Gáhttet boazoguohtuneatnamiid
Ođas | Almmustahtton: 04.03.2024 | Maŋimuš ođasmahttojuvvon: 05.03.2024 | Eanadoallo- ja biebmodepartemeanta
Stáhta ja Norgga Boazosápmelaččaid Riikasearvi sohpe guovvamánu 8. b. boazodoallošiehtadusa 2024/2025. Okta váldovuoruhemiin šiehtadusas lea gáhttet boazoguohtuneatnamiid. Váldovuoruheami ferte geahččat ráđđehusa doaibmabidjopáhka oktavuođas boazodoalu ja energiija várás, mii ovddiduvvui juovlamánu 20. b. 2023.
Boazodoallošiehtadusas 2021/2022 ásahuvvui pilohtaprošeakta areálaáššiid ráđđeaddibálvalusa várás Norgga Boazosápmelaččaid Riikasearvvis. Pilohtaprošeakta lea dál joavdán maŋemus doaibmajahkái, ja ovdalaš ráđđádallamiid ožžo šiehtadallit prošeavtta evaluerema. Evalueren čájeha ahte prošeakta lea gokčan dárbbu boazodoalus, ja ahte ráđđeaddibálvalus lea veahkkin vuhtiiváldán boazodoalu beroštumiid areálaáššiin. Danne leat áššebealit ovtta oaivilis ásahit bistevaš ráđđeaddibálvalusa areálaáššiin, eaktun dasa lea Stuoradikki meannudeapmi šiehtadusas ja bušeahtas 2025 várás. Ráđđeaddibálvalus galgá joatkit pilohtaprošeavtta barggu, muhto áššebealit leat maiddái soahpan lasihit juolludusaid bálvalussii, vai sáhttá virgádit eanet ráđđeaddiid. Eanet dieđuid ráđđeaddibálvalusa birra gávnnat NBR neahttasiidduin.
– Areálaáššiid ráđđeaddibálvalus lea boahtán bures johtui bargguin, ja lea čielga dárbu bálvalussii, dadjá eanadoallo- ja biebmoministtar Geir Pollestad. Bistevaš ráđđeaddibálvalus livččii dehálaš vuođđun boazodoalu mielváikkuheapmái areálaáššiin.
Orohagain lea dehálaš rolla boazodolliid beroštumiid fuolaheamis areálaáššiin. Orohagat ožžot doarjaga mii galgá veahkkin dan gozihit, ovttas eará hálddahusbargguiguin mat orohagas leat. Šiehtadusbealit leat ovtta oaivilis lasihit doaibmadoarjaga Boazodoallošiehtadusas 2024/2025, earret eará nannen dihte orohagaid vejolašvuođa čuovvolit areálaáššiid.
Orohatplána lea dehálaš reaidu gozihit orohagaid beroštumiid areálaáššiin, ja lea maiddái máhttovuođđu almmolaš eiseválddiide. Boazodoalloplánat leat vástideaddji plánat boazodollui mat doaimmahuvvojit konsešuvnna vuođul. Dálá šiehtadusas lea vejolaš ohcat doarjaga orohatplánaide main ii leat orohatplána. Boazodoallošiehtadusas 2024/2025 várrejuvvo ruhta ođasmahttit orohatplánaid. Ulbmil dainna lea láhčit dili nu ahte orohagain ja boazoservviin leat ođasmahttojuvvon orohatplánat, mat sáhttet leat buorit máhttovuođut areálaplánemis.
– Boazodoallošiehtadusain 2024/2025 mii čuovvolit boazodoalu ja energiija doaibmabidjopáhka, dadjá eanadoallo- ja biebmoministtar Geir Pollestad. Boazodoallošiehtadus lea mielde nanneme boazodoalu mielváikkuheami areálaáššiin, ja máhttovuođu meroštallamiidda iešguđetlágán areálageavahemiid gaskkas.