Stáhtabušeahtta 2018

Kulturbušeahtta mas leat čielga vuoruheamit

Ráđđehusa ulbmil lea ahte olles riika ássit galget beassat searvat valljis ja girjás kultureallimii. Jagi 2018 kulturbušeahtta lea sullii 13,9 miljárda ruvnna. Dat lea lagabuidda 300 milliuvnna ruvnna lassáneapmi dan salderejuvvon 2017 bušeahta ektui.

Kultuvrralaš ja hutkás ealáhus

Ráđđehus čađaha struktuvrralaš rievdademiid nannen dihte sektovra nanusvuođa ja addit saji eanet hutkkálaš doaimmaide. 2017:s oaččui Norgga Kulturráđđi bargun ásahit Kreativt Norge (Hutkás Norga) Tråantes ja guokte doarjjaortnega ovttaskas dáiddáriidda ja doarjjavuogádaga olles riika hutkkálaš dáiddáriidda. Dan vuoruheami evttohit nannet ja lasihit doarjaga 12 milliuvnna ruvnnain ja viiddiduvvon doaimmaiguin mat maiddái gusket kulturásahusaide.

– Norggas lea leamašan vierrun dustet hástalusaid lasihuvvon almmolaš doarjagiiguin. Norgga kultureallimii galgá ain leat nanu almmolaš ruhtadeapmi, muhto mii fertet seammás nannet dán sektovra dusten dihte daid hástalusaid mat čuvvot eanet globaliserejuvvon ja digitaliserejuvvon servodaga. Danne háliida ráđđehus dan, ahte Norgga Kulturráđđi, mii lea dat njunuš fágabiras dáidda ja kultuvrra dáfus, galgá leat dat mii árjjalaččat duvdá ovdáneami olles sektovrii, lohká kulturministtar Linda Hofstad Helleland.

Eaktodáhtolaš kultureallin

Ráđđehus evttoha nannet eaktodáhtolaš kultureallima 10 milliuvnna ruvnnain. 5 milliuvnna galgá biddjot nannet koarradoaimmaid ja 5 milliuvnna fas amatevrateáhterii.

– Eaktodáhtolaš kultureallin lea dat maid olbmot vásihit iežaset árgabeaivvis. Báikkálaš ja eaktodáhtolaš kulturfálaldagat leat dehálaš vuođđogeađggit norgga kultureallimis ja dán ráđđehusa guovddáš vuoruhanášši. Eanet ruđat amatevrateáhterii ja koaraide nanne dáidda- ja kultureallima eaktodáhtolaš doaimmaid, lohká kulturministtar Linda Hofstad Helleland.

Kulturhistorjjálaš visttiid dibašteapmi ja ođđa gaskkustanarenat

Go stáhta garrasit ruhtada kultureallima, de addá dat nanu kulturásahusaid olles riikii, mat buvttadit alladásat dáidaga. 2018 kulturbušeahttaevttohusas evttohit 324,5 milliuvnna ruvnna našunála kulturvisttiide, mii lea measta duppalit eanet go 2017:s.  Ráđđehus vuoruha ruđaid eanet guovddáš visttiide, ee. ođđa musearusttegii Orkla Industriijamuseii, ođđa scenii Carte Blanche ja Sentralbadet teáhtergarášii Bergenis, ođđa Ibsen-scena Osloi ja Sørlandet dáiddamusea dáiddasilo álggahanbargguide Kristiansandas.   

– Kulturvisttit eai leat dušše suojit dehálaš ásahusaide, muhto min kulturhistorjjálaš visttit muitalit juoidá dan birra geat mii leat. Daid ferte dibaštit, seammás go mii fertet ovddidit ja hukset ođđa visttiid vai nákcet loktet ovdan dáidaga ja kultuvrra olles riikkas. Mii vuoruhit buoret gaskkustanarenaid museaide, seammás go mii maid atnit ávvira čađahit dárbbašlaš vistedivodemiid nugo Našunálateáhtera ja Den Nationale Scene, lohká Linda Hofstad Helleland.

Geahča buot kulturbušeahtta birra dáppe: regjeringen.no