Eanandoallo- ja biebmoministtar deaivvadii sámi ofelaččaiguin
Ođas | Almmustahtton: 10.03.2022 | Maŋimuš ođasmahttojuvvon: 15.03.2022 | Eanadoallo- ja biebmodepartemeanta
Sandra Borch deaivvadii odne sámi ofelaččaiguin, go sii fidne Eanandoallo- ja biebmodepartemeanttas oahpásmuvvamin departemeantta bargui boazodoalu ovdii.
Sámi ofelaččat leat Sámi allaskuvlla Sámi kultur- ja servodatdiehtaga studeanttat. Sámi ofelašbargu gullá sin ohppui. Oahppojagi 2021/22 ofelaččat leat:
- Emma Elliane Oskal Valkeapää, Guovdageainnus ja Gárasavvonis eret
- Ida Emilie Marakatt Lindseth, Lillestrømas eret
- Ane Malene Nordeng, Ivgobađas ja Gáivuonas eret
- Nathaniel Holan Larsen, Áravuomis eret
– Lea hui suohtas munnje, boazodoalloministtarin, deaivat áŋgiris sámenuoraid, geat máhttet ollu, dadjá Sandra Borch. Sámi ofelaččat barget mávssolaš barggu kultuvrraset gaskkustemiin miehtá riikka.
Sámi ofelaččat leat sámenuorat, geat gaskkustit dieđuideaset iežaset kultuvrra birra, go gulahallet njuolga eará nuoraiguin. Sámi ofelaččat johtet skuvllain, ja muitalit iežaset árgabeaivvis, kultuvrras ja árbevieruin. Nu sii ovddidit positiiva guottuid ja nuorat diehtigohtet eanet sápmelaččaid ja sámi kultuvrra birra. Ortnet gullá ráđđehusa strategiijai vaššiságaid vuostá. Ofelaččaid ohppui gullá fitnat departemeanttaid guossis, gos besset vásihit mo hálddahus doaibmá ja mo iešguđet departemeanttat barget sámi áššiiguin.