Mánáid- ja bearašministtar oažžu raportta mánáid birra geafes bearrašiin
Ođas | Almmustahtton: 17.10.2023 | Maŋimuš ođasmahttojuvvon: 24.10.2023 | Mánáid- ja bearašdepartemeanta
Áššedovdi joavku mánáid dili birra geafes bearrašiin ovddidii iežas čielggadeami mánáid- ja bearašministarii golggotmánu 17. beaivvi. Raporttas bohtet ovdan sin rávvagat dasa movt nannet mánáid dili geat bajásšaddet geafes bearrašiin ja movt eastadit geafivuođa čuovvumis boahtte bulvii.
– Mánát eai galgga Norggas dárbbašit bajásšaddat geafivuođas. Ráđđehus vuoruha bargat dan ovdii ahte unnidit erohusaid ja eastadit geafivuođa. Dat lea dehálaš sihke mánáide ja bearrašiidda, ja servodahkii, lohká mánáid- ja bearašministtar Kjesti Toppe (Gb).
Dál bargojuvvo olu eastadit geafivuođa mánnábearrašiin ja unnidit daid negatiiva váikkuhusaid maid bajásšaddan geafivuođas mielddisbuktá. Riikkaidgaskasaš dili ektui leat Norggas unnán mánát geat ellet bearrašiin main lea bistevaččat unnán sisaboahtu, muhto dilli lea guhká mannan boasttuguvlui.
– Vaikko mii leat nannen bálvalusfálaldagaid mánáid ja nuoraid guovdu, de fertet mii duođas váldit dan ahte bearrašiid lohku, main lea unnán sisaboahtu, lea lassánan.
Danne nammadii Støre ráđđehus borgemánus 2022 áššedovdi joavkku guorahallat mánáid dili geafes bearrašiin, dadjá Toppe.
Áššedovdi joavkku jođiheaddji, servodatekonomiija professor Stavanger Universitehtas, Mari Rege, ovddidii odne raportta ja áššedovdi joavkku rávvagiid.
Geahča dás áššedovdi joavkku mandáhta.
– Mii fertet vuoruhit daid doaibmabijuid main lea buoremus ávki. Mun áiggun dárkilit guorahallat áššedovdi joavkku árvvoštallamiid ja rávvagiid, ja giittán joavkku barggu ovddas dán hui dehálaš áššis, lohká Toppe.
Raporta sáddejuvvo gulaskuddamii, ja 2025:s ovddida ráđđehus stuoradiggedieđáhusa sosiála dássema ja sosiála mobilitehta birra. Dán oktavuođas ovttasbarget máŋga departemeantta áššesurggiid rastá, buoridan dihte mánáid ja nuoraid dilálašvuođaid.
Loga dás áššedovdi joavkku raportta mánáid birra geafes bearrašiin: Mánnávuohta boahtteáiggi vuođđun, geafes bearrašiid mánáid birgen ja oahppan.
Loga áššedovdi joavkku čoahkkáigeasu mánáid birra geafes bearrašiin sin neahttasiiddus.
Geahča raportta geigema golggotmánu 17. beaivvi 2023: Áššedovdi joavku ovddida iežas čielggadeami mánáid birra geafes bearrašiin