Norgga Boazosápmelaččaid Riikkasearvvi gáibádusat boazodoallošiehtadallamiidda
Ođas | Almmustahtton: 09.01.2024 | Eanadoallo- ja biebmodepartemeanta
Norgga Boazosápmelaččaid Riikkasearvi (NBR) geigii odne iežas gáibádusa 2024/2025 boazodoallošiehtadusa šiehtadallamiidda.
Boazodoalu váldošiehtadusa vuođul šiehtadallet stáhta ja NBR boazodoallošiehtadusa juohke jagi. Šiehtadus sisttisdoallá ekonomalaš váikkuhandoaimmaid maid ulbmil lea olahit boazodoallopolitihka mihttomeriid. Bealálaččat sáhttet maiddái gáibidit šiehtadallamiid eará áššiin go ekonomalaš váikkuhandoaimmaid hárrái.
NBR gáibádusa ekonomalaš rámma lea 261,4 miljovnna kruvnno. Dat lea 61,4 miljovnna kruvnno eanet go dála šiehtadus.
NBR váldo vuoruheamit leat njuolggodoarjagiid lasiheapmi, ja dáid searvvis golbma ođđa doarjjaortnega. NBR áigu dasto vuoruhit lasihit Boazodoalu ovddidanfoandda friddja rámma, earret eará buoridan dihte vejolašvuođa doarjut áiddiid ja gárderusttegiid.
– Norgga Boazosápmelaččaid Riikkasearvi lea ovddidan viiddis gáibádusa, sihke sturrodaga ja fáttáid dáfus. Sii váldet maid ovdan moanaid dilálašvuođaid mat leat olggobealde šiehtadusa. Dat dagaha dán jagi šiehtadallamiidda gáibideaddji vuolggasaji, dadjá stáhta šiehtadallanjođiheaddji Viil Søyland.
Stáhta fálaldat ovddiduvvo ođđajagemánu 26. beaivvi.
