Ođđa seaivunsadji Namsosii ja Hámmerfestii

Ráđđehus lea 2022 reviderejuvvon nationálabušeahtas árvalan juolludit 38,2 miljovnna kruvnno lasi ođđa gádjunhelikopteriid, SAR Queenaid, seaivunsajiid heiveheapmái Namsosa ja Hámmerfeastta buohcceviesuid oktavuođas.

– Ráđđehus árvala dál juolludit lasi ruđa ođđa gádjunhelikopteriid seaivunsajiide, nu ahte besset geavahišgoahtit Namsosa ja Hámmerfeastta seaivunsajiid. Dat nanne gearggusvuođa ja dahká ássiid dili oadjebasabun, dadjá dearvvašvuođa- ja fuolahanministtar Ingvild Kjerkol.

Namsosa ja Hámmerfeastta buohcceviesuid doaimmat lasihuvvojit Norgga eará buohcceviesuid seaivunsajiid heivehemiide, mat jo gullet ođđa gádjunhelikopteriid háhkanprošektii.

Oadjebasat

Ođđa gádjunhelikopterat dahket eallima oadjebasabun daidda geat orrot ja barget meara alde, rittus ja boaittobealeguovlluin miehtá riikka. Helikopterat leat johtileappot ja daiguin olahit čielgasit viidáseappot go dálá Sea King ‑helikopteriiguin.

Dain lea maid stuorra mátkkošteddjiidlatnja, maid sáhttá álkibut heivehit iešguđet doaimmaide ja masa čáhket máŋga heađálačča. Dat maid heive bures dálkkodeapmái. Helikopteriin leat buorit iešvuođat buotlágan dálkkiin ja buoret ohcanreaiddut, vai olbmot ožžot veahki johtileappot. Vuosttaš helikopter váldui atnui Solas čakčamánu 1. beaivve 2020. Plánejit ahte buot ođđa gádjunhelikopteriid leat váldán atnui 2023.

– Ráđđehusa árvalus mielddisbuktá maid, ahte mii 2023 evttohit juolludit 135,6 miljovnna kruvnno seaivunsajiid heivehemiid gárvemii. Hámmerfeastta ja Namsosa guovlluid ássit leat garrasit vuordán dan, dadjá dearvvašvuođa- ja fuolahanministtar Ingvild Kjerkol.

Eai čadno

Go Namsosa buohcceviesu seaivunsadji heivehuvvo, de eai čadno kritihkalaš dearvvašvuođabargit johtit lagamus girdišilljui ja ruovttoluotta.

Hámmerfeastta buohcceviessu lea okta buohcceviesuin, gosa seivot goralaččat eanemus háviid gádjunhelikopteriiguin. Dat lea maid áidna riikka buohcceviesuin, maidda gádjunhelikopterat seivot juohke vahku, muhto main ii leat sierra seaivunsadji helikopteriidda. Danin dárbbašuvvo dál sierra seaivunsadji dalán buohcceviesu oktavuođas, go Hámmerfestii huksejuvvo dál ođđa buohcceviessu.

Ráđđehus árvala jagiide 2022 ja 2023 juolludit oktiibuot 79,2 miljovnna kruvnno Namsosa buohcceviesu seaivunsadjái ja 94,6 miljovnna kruvnno Hámmerfeastta buohcceviesu seaivunsadjái.