Stáhtabušeahtta 2020:
Opšuvdnavearroortnet viiddiduvvo smávva fitnodagaide mat álggahuvvojit
Historjjálaš arkiiva
Almmustahttináigodat Solberga ráđđehus
Almmustahtti: Ruhtadandepartemeanta
Preassadieđáhus | Nr: 61/2019 | Almmustahtton: 07.10.2019
Ráđđehus háliida viiddidit opšuvdnavearroortnega smávva fitnodagaide mat álggahuvvojit. Bajimus opšuvdnaárvu juohke bargi nammii duppalastojuvvo 500 000 ruvnnus 1 miljovnna ruvdnui. Ráđđehus evttoha maid addit eanet fitnodagaide vejolašvuođa searvat ortnegii.
Opšuvdnaárvvu duppalastima lassin, loktejuvvo maid bargiid lohku 10 bargis 12 bargái dain fitnodagain mat ortnegis leat mielde. Dat mielddisbuktá ahte eanet smávva fitnodagat sáhttet ortnegii searvat.
- Dáid rievdadusaid mielde šaddá smávva álggahuvvon fitnodagaide eanet gánnáhahtti geavahišgoahtit opšuvdnasiehtadusaid háhkat ja bisuhit gelbbolaš bargiid iežaset fitnodagain, dadjá ruhtadanministtar Siv Jensen (OvB).
Opšuvdnavearroortnet smávva fitnodatálggaheddjiide álggahuvvui 2018:s. Ortnega mielde sáhttet bargit oažžut opšuvnnaid mat addet vuoigatvuođa oastit ossosiid fitnodagas mearriduvvon haddái. Dálá ortnet gáibida ahte fitnodagain eai oaččo eanet go 10 bargi, ja doaibmaboađut ja balánsasupmi galget leat vuollel 16 miljovnna ruvnno ja fitnodat galgá vuollel guhtta jagi.
- Dál besset eanet smávva fitnodagat illudit go sii ožžot dál vejolašvuođa gilvalit stuorit fitnodagaiguin. Rievdadusevttohusain mii čuovvulat Granavolden-šiehtadusa ja Kapitálalávdegotti ávžžuhusa, dadjá Jensen.
Ortnet mearkkaša earret eará ahte opšuvnnaid vearrogeatnegasvuohta maŋiduvvo dassá go ossosat mat leat ostojuvvon opšuvdnašiehtadusa bokte leat vuvdojuvvon. Maŋiduvvon vearrogeatnegasvuohta lea ráddjejuvvon bajimus opšuvdnaárvui, mii dál evttohuvvo duppalastojuvvot.
ESA galgá ortnega viiddideami dohkkehit ovdalgo fápmuduvvo. Ráđđehus bargá dan ovdii ahte rievdadusat galget dohkkehuvvon ovdal ođđajagi, vai doaibmagohtet ođđajagimánu 1.b.2020 rájes.