Aktiver Javascript i din nettleser for en bedre opplevelse på regjeringen.no

Jagi 2020 reviderejuvvon nationálabušeahtta

Opšuvdnavearroortnet viiddiduvvo smávva áiddo álggahuvvon fitnodagaide

Dát sisdoallu lea eanet go 4 mánu boaris. Danne sáhttet dieđut leat boarásmuvvan. Ođasmahttojuvvon dieđuid oainnát dás Corona-dilli.

Ráđđehus háliida viiddidit ortnega man mielde vearuhit opšuvnnaid smávva áiddo álggahuvvon fitnodagain. Ođđa ortnet mearkkaša ahte šaddá álkit háhkat ja bisuhit bargiid, ja dan ahte stuorit fitnodagat ja eanet bargit sáhttet searvat ortnegii.

– Smávva fitnodagat mat álggahuvvojit leat dehálaččat norgga ealáhuseallimii, ja lea ge hui dehálaš ahte dat nagodit bisuhit ja háhkat čeahpes bargiid dakkár eahpesihkkaris dilis mas mii dál leat. Ortnega viiddideapmi dagaha ahte eanet fitnodagat ja bargit sáhttet searvat ortnegii, dadjá ruhtadanministtar Jan Tore Sanner (O).

– Ollu fitnodagat mat áiddo leat álggahuvvon leat massán sisaboađu ja vásihit ahte kapitála maid nohkagoahtá. Viiddideapmi mielddisbuktá ahte fitnodagaide gánnáhišgoahtá geavahit opšuvnnaid bálkágaskaoapmin. Ortnet lea okta vuohki veahkehit fitnodatálggaheddjiid ja smávva fitnodagaid vai birgejit roasu čađa, dadjá ealáhusministtar Iselin Nybø (G). 

Opšuvdnavearroortnet smávva áiddo álggahuvvon fitnodagaid várás gusto dálá njuolggadusaid mielde dušše sidjiide geat leat virgáduvvon maŋŋil ođđajagimánu 1.b. 2018. Ráđđehus háliida heaittihit dán mearrádusa vai buot bargit guoskevaš fitnodagain sáhttet geavahit opšuvdnavearroortnega. Dušše dát rievdadus mearkkaša ahte beali eanet bargit sáhttet geavahišgoahtit ortnega. 

Ráđđehus háliida maid viiddidit ortnega, vai ortnet gusto fitnodagaide gos leat eanet bargit ja alit doaibmaboahtu go maid dálá njuolggadusat gáibidit. Dál lea bargiidlohku ráddjejuvvon 12 olbmui. Bargiidlohku evttohuvvo lasihuvvot 25 olbmui.  Fitnodaga ollislaš doaibmaboahtu ja dássádatsupmi galgá lasihuvvot dálá 16 milj. kruvnnus 25 milj. kruvdnui.

Fitnodagaide šaddá álkit bisuhit čeahpes bargiid go sáhttet fállat geasuheaddji opšuvnnaid maiddái sidjiide geat leat virgáduvvon ovdal ođđajagimánu 1.b.2018. Sii leat dávjá hui mávssolaččat fitnodaga viidáset ovdáneapmái. Dál go evttohat viiddidit ortnega nu ahte stuorit fitnodagat maid sáhttet dasa searvat, de dat mielddisbuktá ahte eanet fitnodagat ožžot vejolašvuođa geavahit opšuvdnavearroortnega háhkat ja bisuhit bargiid.

ESA galgá viiddideami dohkkehit ovdalgo fápmuduvvo.

Loga eanet: Prop. 107 LS (2019–2020) Endringar i skatte-, avgifts- og tollovgivinga kapihtal 5.