Norgga Boazosápmelaččaid Riikkasearvvi gáibádusa geigen

Eanandoallo- ja biebmodepartemeanta šiehtada juohke jagi boazodoallošiehtadusa NBR:in. Gustojeaddji njoammuneastadandoaibmabijuid dihte, ovdanbuktojuvvui dán jagi gáibádus videočoahkkima bokte šiehtadusbeliid gaskka.

Gáibádusa ekonomalaš rámma lea 225,35 miljovnna ruvnna. Dat lea 60,85 miljovnna lasáhus gustojeaddji šiehtadusas mii lea 164,5 miljovnna ruvnno. Dat mearkkaša 37 proseantta rievdan.

• Geahča olles NBR gáibádusa  (pdf)

Nannen dihte boazodoalu guoddevaš ealáhussan, de deattuha NBR erenoamážit dan dárbbu ahte sihkkarastit boazodoalu guohtuneatnamiid. NBR namuha earret eará doaibmabijuid nannen dihte boazodoalloorohagaid resurssaid go barget areálaáššiiguin ja doaibmabijuid unnidit sisabahkkemiid boazodoalu guohtuneatnamiidda. NBR čujuha dasa ahte lassánan beroštusriiddut boazoguohtunguovlluid nalde dagaha eanet hárdima ja rasismma boazodolliid guovdu, ja sávvet dan dihte ahte várrejuvvojit ruđat prošektii eastadan dihte dan. NBR gáibida lasi njuolggojuolludemiid ja evttoha ásahit eanet ođđa juolludanortnegiid, omd. dálkkádatjuolludemiid boazodollui ja sierra juolludeami njuovvat njiŋŋelas bohccuid. Dasa lassin háliida NBR ahte Boazodoalu Ovdánahttinfoandda friddja ruđat lasihuvvojit.

– NBR lea geigen viiddis gáibádusa, sihke ekonomalaš rámma ja fáttá viidodaga dáfus, ja dat ii daga šiehtadallamiid álkin. Dasa lassin dahká boazodoalu areáladilálašvuohta ja guohtunroassu Sis-Finnmárkkus dan ahte mii lávket dán jagi šiehtadallamiidda gáibideaddji duogážiin. Stáhta šiehtadallanlávdegoddi illuda buriid ja konstruktiiva šiehtadallamiidda NBR:in, dadjá stáhta šiehtadallanjođiheaddji Viil Søyland.

Stáhta fálaldat ovdanbuktojuvvo duorastaga ođđajagimánu 27. beaivvi 2022, ja šiehtadallamat galget loahpahuvvot maŋemustá njukčamánu 1. beaivvi 2022.

Stuorit gova