Positiivvalaš ovdáneapmi sámi ulbmiliidda

-Ráđđehusa ulbmil lea láhčit diliid nu ahte sámit besset seailluhit ja ovddidit gielaset, kultuvrraset ja servodateallimeaset. Ráđđehussii lea dehálaš ahte dat speadjalastojuvvo jagi 2021 stáhtabušeahta evttohusas. Ráđđehus evttoha sámi ulbmiliidda oktiibuot váile 1,3 miljárdda ruvnno sturrosaš juolludusa dán bušeahtas, dadjá guovllu- ja digitálaministtar Linda Hofstad Helleland.

Ráđđehus evttoha 57 miljovnna ruvnno sturrosaš doarjaga gárvvistit Máttasámi ođđa museavisti,  Saemien Sijte. Mii evttohat maid 11 miljovnna ruvnno sturrosaš doarjaga projekteret oktasaš visti Beaivváš Sámi nationálateáhterii ja Sámi joatkkaskuvlii ja boazodoalloskuvlii, bargu mii álggahuvvo jagi 2021.

-Lea hui illudahtti ahte mii ovttasbarggus Kulturdepartemeanttain ja Máhttodepartemeanttain beassat sihke álggahit ja gárvvistit dáid huksenprošeavttaid 2021:s. Mii diehtit ahte prošeavttat mearkkašit hui ollu sámi servodahkii, dadjá guovllu- ja digitálaministtar Linda Hofstad Helleland.

Sámediggái evttohuvvo maid lassidoarjja bušeahttaevttohusas, earret eará jagi 2021 sámediggeválggaid čađaheapmái ja Dielddanuori suohkana laktit sámegielaid hálddašanguvlui.

Ráđđehus lasiha doarjagiid sámi ulbmiliidda

Boazodoallošiehtadus 2020/2021 lasihuvvui 13,4 milj.ruvnnuin 2020:s, sullii 10 proseantta eambbo go ovddit jagi.  

-Ráđđehusa mielas lea dehálaš láhčit buori ovttasbarggu sámi beroštumiiguin vai sáhttit čađahit buriid doaimmaid sámi servodahkii, sihke 2021:s ja boahttevaš jagiid. Dan duođaštit juolludusat mat oppalohkái leat lassánan jagis jahkái, dadjá Helleland.

Ollislaš dieđut bušeahttaáššiid birra mat gusket sámiide leat gávdnamis ráđđehus.no siidduin, ja publikašuvnnas Juolludusat sámi ulbmiliidda, stáhtabušeahtta 2021.