Ráđđehus áigu nannet sámi kultuvrra ja nationála minoritehtaid

Ráđđehus evttoha earret eará lasihit doarjaga teáhteriidda, museaide ja álgoálbmotfestiválii Riddu Riđđui.

– Dáinna mii háliidit loktet fidnomáhtolaš kulturásahusaid ja earáid geat áimmahuššet ja ovddidit min nationála minoritehtaid kultuvrra, dáidaga ja gielaid. Lea dehálaš ahte sii besset joatkit dan buori barggu maid dahket, cealká Jaffery.

Ráđđehus árvala 4 miljovnna ruvnno doaibmadoarjaga teáhterii Kvääniteatteri Hánssagiettis boahtte jahkái. Evttohuvvo maiddái ahte Norgga Vuovdesuoma Musea (Norsk Skogfinsk Museum) Svullryas ain oažžu seamma doaibmadoarjaga go 2023:s. Dáiddárkollektiiva Dáiddadállu Guovdageainnus lea maiddái vuosttaš geardde mielde bušeahttaevttohusas 2 miljovnna ruvdnosaš juolludemiin.

– Dáiddadállu lea moatti jagis šaddan sámi dálááiggi dáidaga ja nationála ja riikkaidgaskasaš fágabirrasiid ja gehččiid deaivvadanbáikin. Mii áigut váikkuhit dáiddakollektiivva doaimma ja ovdáneami sihkkarastimii, cealká Jaffery. 

Doarjja teáhteriidda ja museaide

Sámi nationálateáhter Beaivváš rahpá ođđa vistti uvssaid Guovdageainnus boahtte jagi, ja ráđđehus árvala 8,3 miljovnna ruvnno mii galgá gokčat viessoláigguid 2024:s. RiddoDuottarMuseat Kárášjogas dárbbaša ođđa báikkálaš visttiid ja ráđđehus lea evttohan joatkit ovdaprošeaktadási.

– Vai nationála minoritehtat ja sámi álbmot galget sáhttit hálddašit iežaset kultuvrra iežaset eavttuid vuođul, de leat diehttelasat sin iežaset kulturásahusaid mearrideaddji mávssolaččat, cealká Jaffery.

Dasa lassin áŋgiruššojuvvojit gielladoaibmabijut mat leat dehálaččat sámegielaid ovddideapmái ja seailluheapmái. Sámi arkiiva ja Divvun, mat barget sámi giellateknologiijain, ožžot doarjaga ovdaprošektii sámi giellaovddideami birra ja almmusin dahkat sámi jietnavuorkkáid.

Čoahkkáigeassu loguiguin:

• 8,3 miljovnna ruvnno Sámediggái - Beaivváš sámi nationálateáhtera viessoláiggu ovddas 2024:s.
• Viidásetfievrridit RiddoDuottarMuseat ođđa vistti plánema Kárášjogas.
• 2 miljovnna ruvnno sámi dáiddárkollektiivva Dáiddadállu doibmii Guovdageainnus.
• 1,1 miljovnna ruvnno Riddu Riđđu riikkaidgaskasaš álgoálbmotfestiválii.
• 1 miljovdna ruvnno Norlándda museai (Nordlandsmuseet) - ovttasbargoprošektii gaskal Nordlándda musea ja Árran julevsámi guovddáža.
• 2 miljovnna ruvnno Sámi arkiivva ja Divvuma ovttasbargoprošektii - sámi giellaovddideami ja sámi jietnavuorkká almmusin dahkama ovdaprošektii.
• 4 miljovnna ruvnno doaibmadoarjja kvena Kvääneteateatteri- teáhterii.
• 2 miljovdna ruvdnosaš juolludeapmi Norgga Vuovde-Suoma musea doibmii jotkojuvvo.