Reviderejuvvon nationálabušeahtas
Ráđđehus johttáha ođđa álbmotdearvvašvuođakampánnja psyhkalaš dearvvašvuođa ovdii
Ođas | Almmustahtton: 13.05.2022 | Dearvvašvuođa- ja fuolahusdepartemeanta
Ráđđehus háliida nannet psyhkalaš álbmotdearvvašvuođa. Danin álggahuvvo «Buori psyhkalaš dearvvašvuođa ABC – álbmotdearvvašvuođa kampánnja ». Ulbmilin lea lasihit álbmoga máhtu psyhkalaš dearvvašvuođa birra, ovddidit buori psyhkalaš dearvvašvuođa ja eastadit psyhkalaš váttuid.
– Mii diehtit, ahte go dahkat juoidá aktiivvalaččat, dahkat juoidá ovttas earáiguin, ja go dahkat juoidá mas lea mearkkašupmi, de dat buorida olbmo eallinkvaliteahta, maiddái sin eallinkvaliteahta, geat rahčet psyhkalaš gillámušaiguin. Seammás doaimmat sáhttet suddjet olbmo, nu ahte eai šatta psyhkalaš váttut. Danin mii háliidit dál álggahit psyhkalaš dearvvašvuođa ABC ‑álbmotdearvvašvuođa kampánnja, dadjá dearvvašvuođa- ja fuolahanministtar Ingvild Kjerkol.
Geahččaluvvo Trøndelágas
ABC lea oaniduvvon sániin Act, Belong, Commit, maid sisdoallu lea A: Daga juoidá aktiivvalaččat. B: Daga juoidá ovttas earáiguin, C: Daga juoidá ulbmillačča. Trøndelága fylkkagielda čađaha vuos geahččalankampánnja, mii sáhttá ovddiduvvot nationála álbmotdearvvašvuođakampánnjan. Geahččaleami čađahit 2022-2024.
Lea vuđolaččat čájehuvvon, ahte doaimmat, sosiála gullevašvuohta ja ulbmillaš doaimmaide searvan ovddida buori eallinkvaliteahta ja psyhkalaš dearvvašvuođa. Psyhkalaš dearvvašvuođa ja buori eallinkvaliteahta ABC lea dan dáfus mávssolaš, ahte dan heive geavahit máŋgga oktavuođas. Nationála diehtojuohkinkampánnjain dahkat ABC-jurddašeami ollašuhttima álkibun máŋgga oktavuođas.
Dárbbašit eanet dieđuid
Mis leat máŋggaid jagiid leamaš lihkostuvvan áŋggirdeamit eallindábiid ja fysihkalaš dearvvašvuođa ovdii. Dán áigge eatnašat dihtet ahte lea vahágin borgguhit, dearvvašlaš lihkadit ja ahte šattuid ja ruotnasiid borran ovddida dearvvašvuođa. Psyhkalaš dearvvašvuođa suorggis mis eai leat leamaš sullasaš čielga diehtojuohkinkampánnjat, maiguin ovddidit álbmotdearvvašvuođa. Dan ráđđehus áigu ovddidit psyhkalaš dearvvašvuođa ABC:in.
ABC vuođul hábmejuvvon álbmotdearvvašvuođakampánnja vuođđun lea viiddis máhttu, man oassin lea psyhkalaš dearvvašvuođa dutkan, Australia ja Dánmárkku vásáhusat, Norggas čađahuvvon doaimmat ja Trøndelága álbmotdearvvašvuođalihtu (Folkehelsealliansen) doaimmat.