Ráđđehus lávdada dorvobáikeohcciid registrerema Ukraina soađi oktavuođas

Dát sisdoallu lea eanet go 2 jagis boaris.

Go jo Ukrainas leat báhtaran nu ollu olbmot Eurohpái, ráđđehus ásaha dál eanet sajiid, main dorvobáikeohccit sáhttet registreret iežaset. Nu šaddá ukrainalaččaide álkibun ohcat dorvobáikki doppe gos sii leat.

– Mii ráhkkanahttit Norgga báhtareddjiid heahtedillái, mii soaitá šaddat stuorisin ja gáibidit ollu návccaid. Danin Ráđđehus dál ordne nu ahte dorvobáikeohccit sáhttet registreret iežaset eanet sajiin Norggas. Dat geahpeda Råde nationála joavdanguovddáža bargodeattu ja dahká dili álkibun daidda ukrainalaččaide, geat jo leat eará guovlluin go Østlánddas, go galget registreret iežaset, dadjá justiisa- ja gearggusvuođaministtar Emilie Enger Mehl.

Dábálaččat buot dorvobáikeohccit, geat bohtet Norgii, galget registreret iežaset Råde nationála joavdanguovddážis. Ráđđehus buorida dál earret eará Politiija olgoriikaovttadaga (PO) kapasiteahta sullii 100 virggiin. Nu nannejit Råde bargonávccaid ain eanet. PO lea maid viiddidan kapasiteahta, mainna fuolahit dorvobáikeohcciin ovdal registrerema Scandic Helsfyr hoteallas.

– Politiija registrere dál vuos dorvobáikeohcciid gávcci politiijaguovllus – Agder, Mátta-Oarji, Oarji, Møre ja Romsdal, Trøndelága, Nordlánda, Romsa ja Finnmárku. Politiija dárbbaša vehá áiggi ráhkkaneapmái. Danin registreren doaibmagoahtá gaskavahku njukčamánu 16. b. dii 08.00 rájes, vai dat livččii rievttes lágan ja ovttalágan miehtá riikka. Dárbbu mielde sáhttá álggahit registrerensajiid maid eará báikkiide, dadjá Mehl.

Loahppaguovlluide (Oslo, Nuorti, Mátta-Nuorti ja Innlandet) fállojuvvojit seammá bálvalusat Råde joavdanguovddáža bokte.

– Deattuhan ahte lea mávssolaš, ahte dat geat bohtet Norgii, dahje geat jo leat dáppe, registrerejit iežaset. Das leat guokte beali – vuosttažettiin Norgga eiseválddit dárbbašit diehtit geat riikkas leat, ja nuppádassii, ahte olbmot fertejit registreret iežaset vai ožžot gaskaboddasaš persovdnanummira, nu gohčoduvvon D-nummira, vai besset geavahit bálvalusaid, dadjá justisministtar.

Ukrainalaččat, geain lea biometralaš pássa, eai dárbbaš visuma Norgii vuosttaš 90 beaivái. Sii sáhttet orrut riikkas turistavisumiin dan áigodaga, muhto fertejit registreret iežaset, jos háliidit eiseválddiin čuovvoleami.

Guovlu

Dorvobáikeregistrerema báiki

Finnmárkku politiijaguovlu

Girkonjárgga politiijastašuvdna

Álttá politiijastašuvdna

Hámmerfeastta politiijastašuvdna

Romssa politiijaguovlu

Romssa politiijaviessu

Nordlándda politiijaguovlu

Brønnøysund politiijastašuvdna

Muoffi politiijastašuvdna

Bådådjo politiijastašuvdna

Áhkánjárgga politiijastašuvdna

Sortlándda politiijastašuvdna

Trøndelága politiijaguovlu

Troandima (guovddáš) politiijastašuvdna

Steinkjer politiijastašuvdna

Trondheim girdišillju Værnes

Møre ja Romsdal politiijaguovlu

Ålesund politiijastašuvdna

Kristiansund politiijastašuvdna

Oarjji politiijaguovlu

Thon Hotel Bergen Airport, Čuj. Kokstadvegen 3, 5257 Bergen.

Mátta-Oarjji politiijaguovlu

Jæren politiijastašuvdna Brynes

Stord politiijastašuvdna

Agdera politiijaguovlu

Kristiandsándda politiviessu