Ráđđehus evttoha 30 miljovnna kruvnnu liigejuolludusa boazodoalu guohtunroasu hálddašeapmái

Ráđđehus lea dál mearridan evttohit Stuoradiggái, ahte juolludit 30 miljovnna kruvnnu sturrosaš liigejuolludusa boazodoalu roassogearggusvuođafondii.

– Boazodoallu lea dál hui gáibideaddji dilis, ja munnje, boazodoalloministtarin lea dehálaš láhčit dili ealáhussii vai dat birge roasus. Ealáhus vásiha dál erenoamáš garra bargonoađi ja dili, ja danne lea dehálaš ahte ráđđehus veahkeha ealáhusa boazodoalu roassogearggusvuođafoandda ásahuvvon vuogádaga bokte, dadjá eanadoallo- ja biebmoministtar Sandra Borch.  

Ealáhus lea šaddan garrasit gillát guohtunroasu geažil dán dálvvi. Roasu sivva lea go eatnamat leat čađa jikŋon, ja ollu muohta dagaha vel ahte boazu ii beasa guohtut. Guohtunroassu lea váikkuhan hui negatiivvalaččat boazodollui dán dálvvi. Bohccuide lea šaddan dađi váddáset gávdnat biebmu, ja guohtunroassu lea eanaš boazodoalloguovlluin Finnmárkkus, Romssas ja Nordlánddas. Daid guovlluin fertejit dál biebmat sullii 160.000 bohcco.

– 30 miljovnna kruvdnosaš liigejuolludus dahká vejolažžan bisuhit dálá ortnegiid ja veahkehit boazoeaiggádiid birgehit ealáhusa roasus. Mun áiggun čuovvut dili dárkilit dassái go guohtundilli fas buorrána, sihke boazodoalloeiseválddiid čuvgejumi bokte ja lagaš gulahallamiin Norgga Boazosápmelaččaid Riikkaservviin, dadjá eanadoallo- ja biebmoministtar.   

Ráđđehus evttoha 30 miljovnna kruvnnu liigejuolludusa guohtunroasu hálddašeapmái.
Ráđđehus evttoha 30 miljovnna kruvnnu liigejuolludusa guohtunroasu hálddašeapmái. Govva: Eanadoallo- ja biebmodepartemeanta

Roassogearggusvuođafoanda ruhtaduvvo boazodoallošiehtadusa bokte. Norgga Boazosápmelaččaid Riikkasearvi ja Eanadoallo- ja biebmodepartemeanta sohpe ođđajagimánus doarjjaortnega man vuođul gearggusvuođafoanda buoremus lági mielde galgá geavahuvvot hálddašan dihte guohtunroasu. Ortnegii leat ráhkaduvvon sierra njuolggadusat.  Njuolggadusaid mielde sáhttá roassodoarjja geavahuvvot iešguđet doaibmabijuide, erenoamážit oastit ja fievrridit fuođđariid ealuid lusa ja geasehit bohccuid dálveorohagas giđđa- ja geasseorohahkii. Norgga Boazosápmelaččaid Riikasearvi ja Eanadoallo- ja biebmodepartemeanta leat Boazodoalu ovdánahttinfoandda ruđaid ja ieškapitála sirdán roassogearggusvuođafondii vai sáhttet juolludit roassodoarjaga boazoeaiggádiidda.  Guohtunroassu joatkašuvvá ain ja  foandaruhta ii leat doarvái ruhtadit buot  doarjjaohcamušaid. Ráđđehusa mielas lea dál dárbu lasihit foandda ruđaid sihkkarastit elliidčálggu ja boahttevaš buvttadeami.