Aktiver Javascript i din nettleser for en bedre opplevelse på regjeringen.no

Ráđđehus sádde gulaskuddamii rievdadusevttohusa Finnmárkoláhkii

– Ráđđehus evttoha joatkit dálá Finnmárkolága smávit rievdadusaiguin, mii mielddisbuktá ahte láhka gusto seamma geográfalaš guovllus go dál. Ulbmil lea sihkkarastit Finnmárkku ássiid vuoigatvuođaid, dadjá gielda- ja ođasmahttinministtar Monica Mæland.

Ráđđehus sádde odne gulaskuddancealkámuša mas evttohuvvojit rievdadusat Finnmárkoláhkii. Finnmárkoláhka mudde riektedilálašvuođaid ja eanan- ja luondduresurssaid hálddašeami Finnmárkku fylkkas, ja dat lea erenoamáš ortnet mii guoská dušše Finnmárkui. Romssa ja Finnmárkku fylkkat galget ovttastahttojuvvot ođđajagimánu 1.b. 2020. Láhka ferte dan geažil rievdaduvvot.       

– Romssa ja Finnmárkku fylkkaid ovttastahttin gáibida rievdadusaid Finnmárkolágas. Cealkámušas mii sáddejuvvo gulaskuddamii, leat evttohan dušše smávit teknihkalaš rievdadusaid, dadjá gielda- ja ođasmahttinministtar Monica Mæland.

Muhtun njuolggadusat Finnmárkolágas gustojit dušše Finnmárkku fylkii ja fylkka politihkalaš ásahusaide. Daid lea dárbu divodit. 

Gulaskuddancealkámušas evttohat ahte Finnmárkku ássit galget ain beassat stivret Finnmárkkuopmodaga, ja vejolaš badjebáza maid Finnmárkkuopmodat máksá fylkkagildii galgá Finnmárkku álbmogii boahtit buorrin.

– Ráđđehus atná dehálažžan ahte guoskevaš oasálaččat ovddidit oaiviliiddiset gulaskuddancealkámuššii – ja mus lea nana jáhku dasa ahte mii nagodat gávdnat buriid čovdosiid álbmogii,  cealká gielda- ja ođasmahttinministtar Monica Mæland.

Láhkabarggus háliida Gielda- ja ođasmahttindepartemeanta lagas ovttasbarggu ja ráđđádallamiid  Sámedikkiin, Romssa fylkkasuohkaniin ja Finnmárkku fylkkasuohkaniin. 

 

 

Bajás