Boazodearvvašvuođabálvalus ásahuvvo bistevaš ortnegin
Ođas | Almmustahtton: 22.02.2024 | Maŋimuš ođasmahttojuvvon: 23.02.2024 | Eanadoallo- ja biebmodepartemeanta
2024/2025 boazodoallošiehtadusas sohpe Eanandoallo- ja biebmodepartemeanta ja Norgga Boazosápmelaččaid Riikkasearvi ásahit dearvvašvuođabálvalusa bohccuide bistevaš ortnegin. Dearvvašvuođabálvalus lea bures váldojuvvon vuostá ealáhusa bealis ja das lea leamaš alla aktivitehta dan rájes go bálvalus álggahuvvui pilohtaprošeaktan guovvamánus 2022.
Maŋŋel go pilohtaprošeavtta evaluerejuvvui, de lei ovttaoaivilvuohta joatkit bohccuid dearvvašvuođabálvalusain. Dainna eavttuin ahte Stuoradiggi dohkkeha sohppojuvvon šiehtadusa, ásahuvvo Boazodearvvašvuođabálvalus suoidnemánu 1. b. 2024 rájes bistevaš ortnegin.
– Bohccuid dearvvašvuođabálvalus lea bargan ulbmillaččat ja bures dan rájes go pilohtaprošeakta álggahuvvui jagi 2022. Lea buorre oaidnit ahte boazodoallit oidnet ávkki bálvalusas ja ahte dat lea bures vuostáiváldojuvvon. Bálvalus lea dehálaš bagadallan- ja máhtolašvuođaásahus boazodollui, ja mun illudan viidáset ovdáneapmái, dadjá eanandoallo- ja biebmoministtar Geir Pollestad.
Eambbo dieđut Boazodearvvašvuođabálvalusa birra
2021/2022 boazodoallošiehtadusa šiehtadusbealit dat ásahedje Boazodearvvašvuođabálvalusa, álggos golmma jagáš pilohtaprošeaktan mas Veterinearainstituhtta lei verddeorganisašuvdnan. Dál jođiha Veterinearainstituhta Romssa ossodat prošeavtta. Boazodearvvašvuođabálvalusa ulbmil lea nannet máhtolašvuođa buori elliidčálggu birra boazodoalus ja veterinearaid gaskkas. Dearvvašvuođabálvalus galgá ovddidit veterinearaid máhtu boazodoalu birra ja boazosámi kultuvrra birra. Dearvvašvuođabálvalus galgá maiddái váikkuhit máhttovuođu buorideapmái ja ovddidit vuogádaga man vuođul sáhttá analyseret ja gozihit boazodávddaid. Ulbmiljoavku lea boazodoallu ja veterinearat.
Boazodearvvašvuođabálvalusas lea sierra Facebook-siidu ja sierra neahttasiidu man Veterinearainstituhtta jođiha:
Neahttasiiddus leat dieđut boazodearvvašvuođabálvalusa birra, bohccuid dearvvašvuođa ja dávddaid birra, guoskevaš ođđasat, liŋkkat fágagirjjálašvuhtii, dieđut kurssaid ja webináraid birra, gulahallandieđut jna. Boazodearvvašvuođabálvalusa veterinearat sáhttet vástidit gažaldagaid ja digaštallat čuolmmaid mat gusket bohcco dearvvašvuhtii. Veterinearat fállet rávvagiid telefovnna bokte ja digitálalaččat, singuin sáhttá váldit oktavuođa almma namutkeahttá nama ja sis lea jávohisvuođageatnegasvuohta.
