Ovdasiidu

Sandra Borch lea čoahkkinastán Boazodoallostivrrain

Guohtunriiddut, boraspirevahágat, Fosen-duomu čuovvoleapmi, CWD-dávdda leavvanvárra ja boazodoalloláhkarievdadus ledje muhtun áššit áššelisttus go eanadoallo- ja biebmoministtar čoahkkinasttii Boazodoallostivrrain juovlamánu 12.beaivvi 2022.

Boazodoallostivra lea fágalaš ráđđeaddi eiseválddiide ja hálddašanorgána mii galgá bargat dan ovdii ahte eiseválddit olahit boazodoallofágalaš mihttomeriid. Boazodoallostivra ja eanadoallo- ja biebmoministtar deaivvadit oktii jagis.

Dieđihii ahte čoahkkin guohtunriidduid birra galgá lágiduvvot

Dán jagi gulahallančoahkkimis muitalii Boazodoallostivra ahte riiddut boazodolliid ja šibitdolliid gaskkas leat lassánan riikkas. Sihke stivrajođiheaddji Inge Ryan ja stáhtaráđđi Sandra Borch deattuheigga ahte buorre gulahallan lea dehálaš čoavdin dihte dákkár áššiid.

– Buot guohtunriidduid ii sáhte čoavdit, muhto mun lean vásihan ahte eanaš riidduid lea vejolaš čoavdit jos eanadoallit ja boazodoallit gulahallet gaskaneaset, dajai Boazodoallostivrajođiheaddji Inge Ryan.

– Sihke boazodoallu ja eanadoallu leat áitojuvvon ealáhusat, ja mii oaidnit ahte guohtunriidduid gilvojuvvon eatnamiin ferte duođas váldit. Mun áiggun ođđajagis bovdet boazodoalu fágaservviid ja eanadolliid čoahkkimii gos mii galgat ságastallat mo mii ovttas sáhttit gávdnat buriid čovdosiid, dadjá Sandra Borch.

Inge Ryan, boazodoallostivrra jođiheaddji ja biebmoministtar Sandra Borch. Maŋábealde gurut rávddas: stivralahttu Ragnhild Sparrok Larsen, stivralahttu Leif Anders Somby, stivralahttu Siri Vigmostad, várrelahttu Berit Marie P.E.Eira, stivralahttu Asgrim Opdal, stivralahttu Inge Even Danielsen.
Ovddabealde: Inge Ryan, boazodoallostivrra jođiheaddji ja biebmoministtar Sandra Borch. Maŋábealde gurut rávddas: stivralahttu Ragnhild Sparrok Larsen, stivralahttu Leif Anders Somby, stivralahttu Siri Vigmostad, várrelahttu Berit Marie P.E.Eira, stivralahttu Asgrim Opdal, stivralahttu Inge Even Danielsen. Govva: Eanadoallo- ja biebmodepartemeanta

Ollu hástaleaddji áššit

Áššelisttus ledje maid barggut boazodoalloláhkarievdadusain, boazolohkanhástalusat, eanet bohccot gottáhallet boraspiriide, CWD-dávdda leavvanvárra sámi boazodoalloguovlluide ja Fosen-duomu čuovvuleapmi.

– Ollu badjeolbmot vásihit ahte boazodoalu lea váttis doaimmahit go eanet ja eanet bohccot gottáhallet boraspiriide ja go areálasisabahkkemat sturrot dađis. Boazodoalloministtarin, lea munnje áibbas dehálaš ahte politihkka ja buotlágan huksemat boazodoalloguovlluin árvvoštallojuvvojit stáhta geatnegasvuođaid ektui sámiide álgoálbmogin, dadjá eanadoallo- ja biebmoministtar  Sandra Borch.

Ođđa stivra farga sajis

Dálá Boazodoallostivrra doaibmaáigi loahpahuvvo jahkemolsumis. Stivrajođiheaddji Inge Ryan dovddahii giitevašvuođa doaimma ja luohttámuša ovddas. Stáhtaráđđi vástidii ja giittii buori barggu ovddas.   

– Dii lehpet váldán aktiivvalaš rolla vuđolaš áššemeannudeamis, ja go čoahkkimat leat lágiduvvon dehálaš aktevrraiguin ja áššiin ovddiduvvon departementii. Mii dárbbašat máhtolašvuođa mii Boazodoallostivrras lea ja háliidan giitit viiddis ja vuđolaš barggu ovddas maid lehpet doaimmahan dan rájes go doaibmagođiidet, suoidnemánu 1.b.rájes 2019, dadjá Sandra Borch.

Plána mielde nammaduvvo ođđa boazodoallostivra jahkemolsumis.