Soahpan ođđa boazodoallošiehtadusa

Norgga Boazosápmelaččaid Riikkasearvi (NBR) ja Stáhta leat guovvamánu 28.b. soahpan ođđa boazodoallošiehtadusa áigodahkii 01.07.2017 – 30.06.2018.

- Lean ilus go dál leat soahpan ođđa boazodoallošiehtadusa. Šiehtadus vuoruha doaibmabijuid mat galget movttiidahttit eanet njuovvat ja vuovdit bohccobierggu. Dat addá vuođu positiivvalaš ovdáneapmái ja lassi tietnasa juohke boazoeaiggádii, cealká eanandoallo- ja biebmoministtar Jon Georg Dale.  

Šiehtadus mielddisbuktá boazodoalloealáhussii oktiibuot 118,6 miljovnna kruvnno ruhtadoarjaga. Dat lea 4,1 miljovnna kruvnno eanet go dálá boazodoallošiehtadusas.

2017/2018 boazodoallošiehtadusa váldoulbmil lea ovddidit boazodoalu ulbmillaš márkanguvllot ealáhussan mii lea gánnáhahtti guhkitáiggi badjel. 

Ráđđehussoahpamuša vuođul leat vuoruhan doaibmabijuid mat nannejit ekologalaš ceavzilvuođa.  

Ellinor Marita Jåma, Norgga Boazosápmelaččaid Riikkasearvvi jođiheaddji (gurut ravddas) ja stáhta šiehtadallanjođiheaddji, ekspedišuvdnahoavda Anne Marie Glosli vuolláičálliba boazodoallošiehtadusa 2017/2018.
Ellinor Marita Jåma, Norgga Boazosápmelaččaid Riikkasearvvi jođiheaddji (gurut ravddas) ja stáhta šiehtadallanjođiheaddji, ekspedišuvdnahoavda Anne Marie Glosli vuolláičálliba boazodoallošiehtadusa 2017/2018. Govva: Eanandoallo- ja biebmodepartemeanta

Vejolašvuohta loktet tietnasa  

Boazodoallu ealáhussan lea áibbas erenoamáš go das lea vejolašvuohta loktet tietnasa arvat eanet go dál. Šiehtadallanbeliid mielas lea áibbas dárbbašlaš láhčit dili dainna lágiin ahte boazodoallu oažžu vejolašvuođa loktet tietnasa. Boazodoallošiehtadus 2017/2018 movttiidahttá eanet njuovvat ja vuovdit bohccobierggu. Ruhtajuolludeamit Márkanlávdegoddái, Ovddidanprográmmii ja oahpahan- ja fuolahusvuđot bálvalusat leat vuoruhuvvon. Dan lassin ásahuvvo ođđa doarjjaortnet, namalassii bohccuid indiviidamerkenortnet.

Orohatdoarjja lasihuvvo

Šiehtadallanbealit leat maid vuoruhan lasihit orohatdoarjaga, mii galgá láhččit orohagaide  ekonomalaš vuođu hálddašit ovddasvástádusaset go galget ovdánahttit ealáhusa guoddevašvuođa guvlui ja ođasmahttit orohatplánaid ja doaibmanjuolggadusaid.