Stáhtabušeahtta 2024:
2,2 miljárdda kruvnno eambbo buohcciviesuide - vuordináiggit galget oatnut
Ođas | Almmustahtton: 13.10.2023 | Dearvvašvuođa- ja fuolahusdepartemeanta
Ráđđehus árvala 2,2 miljárdda kruvnno juolluduslassáneami buohcciviesuide, earret hadde- ja bálkálassánemiid. Bušeahttaevttohusa ulbmil lea oanidit vuordináiggiid, nannet psyhkalaš dearvvašvuođagáhttema ja juolludus Davvi dearvvašvuođa ovttasdoaibmamii.
– Dáinna bušeahttaevttohusain láhčá ráđđehus dilálašvuođaid dasa ahte pasieanttaid vuordináiggit sáhttet oatnut. 2,2 miljárdda kruvnno rámma siskkobealde nannejuvvo mánáid ja nuoraid, ja duođalaš psyhkalaš buhcciid psyhkalaš dearvvašvuođagáhttema jándordikšu 110 miljovnnain kruvnnuin, dadjá dearvvašvuođa- ja fuolahusministtar Ingvild Kjerkol.
Pandemiija ja goluid eahpedábálaš lassáneapmi lea leamaš hástaleaddjin buohcciviesuid doaimmaide maŋemus jagiid. Vaikko aktivitehta leage lassánan maŋŋel pandemiija, de lea dat ain vuollelis go galggašii leat dábálaš doaimmas. Vuordináiggit leat guhkibut ja daid rihkkun lea lassánan pandemiija oktavuođas, ja leat alibut go maŋemus normála jagis 2019. Dáinna bušeahttaevttohusain lea ráđđehusas ulbmil láhčit dili dasa ahte vuordináiggit sáhttet oatnut 2024:s, ja dearvvašvuođaregiovnnat gohččojuvvojit oanidit vuordináiggiid 2024:s.
Davvi dearvvašvuohta lea váttis dilis
Davvi dearvvašvuođadoaimmahagas lea máŋga jagi leamaš alla gollodássi, ja seammás váilot sis fágaolbmot. Dearvvašvuođa- ja fuolahusministtar lea danne gohččon Davvi dearvvašvuođa erenoamážit geahčadit funkšuvdna- ja doaibmajuogu vai sáhttet deavdit iežaset ovddasvástádusa das ahte fállat buriid ja dásseárvosaš dearvvašvuođabálvalusaid ovddos guvlui.
– Ráđđehus árvala máŋga sierradoarjaga Davvi dearvvašvuhtii, oktiibuot 85 miljovnna kruvnno. Ruhta galgá ovddidit ovttasdoaimma ja nuppástusa ja buoridit bálvalusaid máŋgga sajis, dadjá Kjerkol.
Ruhta juhkkojuvvo dáinna lágiin:
- 40 miljovnna kruvnno ovttasdoaibman- ja nuppástuhttindoarjja Davvi dearvvašvuhtii.
- 25 miljovnna kruvnno viidáseappot ovdánahttit spesialistadearvvašvuođabálvalusaid Álttás, mii erenoamážit galgá mannat buoridit bálvalusaid boarrásiidda ja kronalaš buhcciide.
- 20 miljovnna kruvnno Girkonjárgga buohcciviesu gearggusvuođabargui. Dasa lassin bisuhuvvo 15 miljovdnasaš juolludus intensiivagearggusvuhtii, mii mearriduvvui reviderejuvvon nationálabušeahtas
Investerenloatna buohcciviessohuksemii
Ráđđehus árvala 9,7 miljárdda investerenloanaide 2024:s. Dat árvaluvvo buohcciviesuid dála investerenprošeavttaid ovdáneami vuođul.
Dát sisttisdoallá loatnarámmaevttohusaid guovtti ođđa buohcciviessoprošektii:
- Loatnarámma 881 miljovnna kruvnno Ålesund buohccivissui, Helse Møre ja Romsdal dearvvašvuođadoaimmahaga olis.
- Loatnarámma 375 miljovnna kruvnno Ila sihkarvuođapsykiatriija oktii lokaliseremii, Oslo universitehtabuohcciviesu olis.
Fáktadieđut ráđđehusa evttohusaid birra buohcciviesuide:
- Ráđđehus árvala lasihit juolludusaid buohcciviesuide birrasiid 2,2 miljárdda kruvnnuin 2023 rájes 2024 rádjái. Dat dahká vejolažžan lasihit pasieantadivššu 1,8 proseanttain. Álbmotrievdamat dušše dan dáfus ahte mis lassánit boares olbmot, dahká iešalddis dárbbu lasihit aktivitehta 1,5 proseanttain.
- Regionála dearvvašvuođadoaimmahagat gohččojuvvojit 2024:s oanidit vuordináiggiid 1,5 proseanttain.
- Olbmot, geain leat psyhkalaš váttut, galget oažžut veahki. Árvaluvvon 2,2 miljárdda kruvnnos árvaluvvo 110 miljovnna geavahuvvot jándordikšui psyhkalaš dearvvašvuođagáhttema oktavuođas mánáide ja nuoraide ja sidjiide buorrin, geain leat duođalaš psyhkalaš gillámušat.
- Árvaluvvo doarjja oktiibuot 85 miljovnna kruvnno Davvi dearvvašvuhtii. 2024:s galgá dát ruhta mannat spesialistadearvvašvuođa fálaldaga buorideapmái Álttá klinihkas (25 miljovnna kruvnno), Girkonjárgga buohcciviesu gearggusvuhtii (20 miljovnna kruvnno) ja 40 miljovnna ovttasdoaibmamii.
- Árvaluvvo 25 miljovdna kruvdno ođđa guovllumedisiinnalaš guovddážii Kristiansundas.
- Árvaluvvo 9,7 miljárdda kruvdno investerenloanaide 2024:s. Dat lea buohcciviesuid dála investerenprošeavttaid ovdáneami vuođul.
- Árvaluvvojit loatnarámmat guovtti ođđa buohcciviessoprošektii: Ålesund buohccivissui Helse Møre ja Romsdal dearvvašvuođadoaimmahaga olis (loatnarámma 881 miljovnna kruvnno) ja sihkarvuođapsykiatriija oktii lokaliseremii Ilas, Oslo universitehtabuohcciviesu olis (loatnarámma 375 miljovnna kruvnno).