Ođđasat

Nannet DBS/HMS-bálvalusfálaldagaid boazodoalus

Dát sisdoallu lea eanet go 1 jagi boaris. Danne sáhttet dieđut leat boarásmuvvan.

Eanadoallo- ja biebmodepartemeanta ja Norgga Boazosápmelaččaid Riikkasearvi leat soahpan ásahit bissovaš DBS/HMS-bálvalusortnega boazodollui.

– Ráđđehus čájeha dáinna mearrádusain hui čielgasit ahte mii háliidat ásahit buriid čálgoortnegiid ja bidjat eanet fuomášumi dearvvašvuođa-, biras- ja sihkkarvuođa doaibmabijuide boazodoalus,  dadjá eanadoallo- ja biebmoministtar Sandra Borch.

Bargu boazodoalus lea fysalaččat lossat ja dat lea birrajagi bargu, dávjá garra dálkkis, galbmasis ja buollašis. Dat lea ealáhus gos dáhpáhuvvet olu roasmmuhuvvamat ja lihkohisvuođat.  

2019/2020 boazodoallošiehtadusa šiehtadallamiin várrejuvvui ruhta 3-jagi prošektii ovddidit ja ásahit DBS-fálaldagaid boazodollui. Dán jagi šiehtadallamiin sohpe šiehtadallit ahte  prošeakta galgá šaddat bissovaš doaibman. 

– Prošeakta čájehii ahte boazodoalus lea stuora dárbu DBS-bálvalusaide, ja danne lea hui illudahtti go stáhta ja NBR dál leat soahpan ásahit bálvalusfálaldagaid sierra bálvalusortnegin. Ásaheapmi lea dehálaš váikkuhandoaibma dasa ahte boazodolliide addit oadjebas bargobeaivvi, dadjá eanadoallo- ja biebmoministtar.   

Norgga Eanadoalloráđđeaddinbálvalus (NLR) lea ožžon bargun fuolahit DBS-bálvalusaid boazodollui. Sii galget addit ráđiid, ráhkadit kursa- ja bagadallanreaidduid, lágidit kurssaid ja bagadallančoahkkimiid, ja fállat fitnodatdearvvašvuođabálvalusaid boazodollui dárbbu mielde.  

Eanadoallo- ja biebmodepartemeanta ja Norgga Boazosápmelaččaid Riikkasearvi leat soahpan ásahit bissovaš DBS/HMS-bálvalusortnega boazodollui.
Eanadoallo- ja biebmodepartemeanta ja Norgga Boazosápmelaččaid Riikkasearvi leat soahpan ásahit bissovaš DBS/HMS-bálvalusortnega boazodollui. Govva: Eanadoallo- ja biebmodepartemeanta