Vuoruhit oktasaš čovdosiid kultur- ja dásseárvobušeahtas

Ráđđehus evttoha juolludit oktiibuot 23,3 miljárdda kruvnno Kultur- ja dásseárvodepartemeantta bušeahta bokte. Dat lea lagabui 1,4 miljárdda kruvnno eanet go 2022.

- Buot viiddis ortnegat leat suddjejuvvon juolludemiid unnideami vuostá, ja muhtun surggiid mii nannet, dadjá Trettebergstuen.

2003 kulturbušeahtas leat dát váldovuoruheamit:

• Ráđđehus láhčá eaktodáhtolaš servviide ollislaš lassiárvodivatbuhtadusa ja evttoha lasihit juolludeami 125 miljovnnain kruvnnuin. Olles juolludeapmi gártá badjel 2 miljárdda kruvnno, ja lea 275 miljovnna kruvnno eanet go Solberg-ráđđehusa maŋimuš bušeahttaevttohusas.
• Ráđđehus joatká eaktodáhtolaš servviid rávdnjedoarjaga gitta geassemánu 2023 rádjái, ja juolluda dasa oktiibuot 770 miljovnna kruvnno. Ulbmilin lea doalahit doaimmaid jođus, vaikko rávdnji lea divrras.
• Ráđđehus evttoha lasihit LHBT+-organisašuvnnaid doarjaga 15 miljovnnain kruvnnuin. Juolludeapmi lasihuvvo goasii beliin, ja dainna áigot earret eará sihkkarastit ahte searvvit besset čuovvulit Oslo geassemánu 25. beaivvi falleheami čuovvumušaid.
• Filbma- ja dihtorspeallosuorggis ráđđehus áigu ovddidit máŋggabealatvuođa ja taleanttaid ovdánahttima, ja evttoha lasihit Filbmafoandda juolludemiid 20 miljovnnain kruvnnuin. 5 miljovnna leat várrejuvvon dihtorspealuide ja áŋgiruššamii dihtorspeallokultuvrra ovdii. 
• Ráđđehus evttoha juolludit 15 miljovnna kruvnno Nationaltheatret divvuma viidásut guorahallamii ja 25 miljovnna teáhtervistti vealtameahttun sihkkarastimii. 
• Doaibmabijut girjjálašvuođa ja lohkanmovtta ovddideapmái nannejuvvojit 10,6 miljovnnain kruvnnuin 2023. Ráđđehus ovddida maid ođđa lohkanmoktastrategiija, ja lasiha girjerádjosuorggi prošeakta- ja ovddidandoarjagiid.