Ráđđehus hálida oláhit oktasaš ipmárdusa Sámedikkiin das movt galgá gulahallat dakkár áššiin mat soitet njuolga guoskat sápmelaččaide. Dát boahtá ovdan reivves maid gielda- ja guovluministtar Erna Solberg lea čállán sámedikki presidentii Sven-Roald Nystøii. Das son bovde sin ságastallat dán birra.

– Stuoradikki dieđáhusas nr. 33 sámepolitihka birra áigu Ráđđehus viidáseappot ovdánahttit ovttasbargovugiid Sámedikkiin. Mii berret ovttasráđiid gávnnahit buriid ja ulbmilaš vugiid ráđđehusa ja Sámedikki ovttasbargui, dadjá gielda- ja guovluministtar Erna Solberg. – Go lea sámi áššiid oktiiheiveheaddji departemeanta, de áigu gielda- ja guovludepartemeanta bovdet Sámedikki ságastallat vai oččoše oktasaš ipmárdusa das makkár áššiin ja movt Sámedikkiin berre gulahallat, dadjá gieldaministtar.

- Go sápmelaččat lea Norgga álgoálbmot de lea sis vuoigatvuohta dasa ahte siiguin gulahallet dakkár áššiin mat sáhttet sidjiide njuolga váikkuhit. Dát vuoigatvuohta lea čállojuvvon ILO- konvenšuvdnii nr. 169, eamiálbmogiid ja čearddalaš álbmogiid hárrái iešmearrideaddji riikain maid Norga čuovvolii 1990:s, dadjá stádaráđđi Solberg.

Stádačálli Anders Eira galgá jođihit ságastallamiid Gielda- ja guovludepartemeantta ovddas.