Jahkásaš stuoradiggedieđáhus Sámedikki doaimma birra gieđahallojuvvo Stuoradikkis odne. Dieđáhusas Ráđđehus almmuha iežas oainnu áššiin maid Sámediggi lea gieđahallan iežas 2004 jahkedieđáhusas.

- Áššiin maid stuoradiggedieđáhus gieđahallá háliidan erenoamážit deattuhit finnmárkolága, lohká stáhtačálli Ellen Inga O. Hætta. – Láhka sankšunerejuvvui Stáhtaráđis 17.06.05, ja dál lea álggahuvvon deaŧalaš bargu čađahit lága iešguđet osiid. Galgá ásahuvvot kommišuvdna ja sierra duopmostuollu man doaibman šaddá identifiseret ja dohkkehit árbevirolaš vuoigatvuođaid. Dasa lassin galgá Finnmárkoopmodat ásahuvvot, lohká son.

Maiddái stáhta eiseváldiid ja Sámedikki konsultašuvdnavuogádagat gieđahallojuvvojit vuđolaččat stuoradiggedieđáhusas. Gielddaministtar ja sámediggepresideanta vuolláičáliiga konsultašuvdnasoahpamuša miessemánus dán jagi. Soahpamuša ulbmilin lea dahkat ahte stáhta álbmotrievttálaš geatnegasvuohta gulahallat álgoálbmogiin čađahuvvo geavatlaččat.

-Álgoálbmogin lea sámiin vuoigatvuohta konsulterejuvvot áššiin mat njuolga gusket sidjiide. Dát vuogádagat leat deaŧalaččat sihkkarastimis ahte bargu áššiiguin, main lea mearkkašupmi sámi beroštumiide, dáhpáhuvvá dohkkehahtti láhkái, lohká Ellen Inga O. Hætta.

Sámedikki jahkedieđáhus 2004 lea oassin stuoradiggedieđáhusas, ja mielddusin lea maiddái Sámedikki rehketdoallu 2004. Muđui dieđáhus govvida sámepolitihka iešguđet surggiin.

• St.dieđ.nr. 44 (2004-2005) Sámedikki doaibma 2004