Pressemelding

Nr.: 63
Dato: 26.05.2006

Gollegiella – davviriikkaláš sámi giellabálkášupmi – geigejuvvo fas 2006 čavčča – dáhttut evttohasaid ovdal geassemánu 12. beaivvi

2006 čavčča galgá davviriikkalaš sámi giellabálkášupmi – Gollegiella – geigejuvvut nuppes. Dán giellabálkášumi leat Norgga, Suoma ja Ruoŧa sámeministarat ja sámediggepresideanttat ásahan. Sámeministtar Bjarne Håkon Hanssen geige bálkášumi ministariid ja presideanttaid jahkásaš oktasaščoahkkimis Oslos golggotmánu 18. beaivvi.

- Gollegiella-bálkášupmi galgá čalmmustahttit ahte sámegiella lea ealli giella min riikkain ja Ruoššas, lohká bargo- ja searvadahttinministtar Bjarne Håkon Hanssen. – Mii háliidit dáinna bálkášumiin rámidit soapmásiid sis geat leat dahkan erenoamáš buori barggu ovddidit sámegiela stáhtusa ja geavaheami.

Sámi giellabálkášupmi sáhttá geigejuvvot ovttaskas olbmuide, joavkkuide, organisašuvnnaide dahje ásahusaide mat čálalaš, njálmmálaš dahje earálágan ovdanbuktima bokte bures ovddidan sámegiela. Giellabálkášupmi geigejuvvo juohke nuppi jagi vuoitái Suomas, Ruoŧas, Norggas dahje Ruoššas. Vuoiti oažžu 12500 Euro, mii dahká sullii 100.000 Norgga kruvnno.

- Mun ávžžuhan buohkaid árvalit giellabálkášupmái evttohasaid, vai buot dásiid giellabargu dainna lágiin čalmmustahttojuvvo, ja sávan ollu beroštumi ja evttohusaid, dábálaš báikkálaš giellabirrasiid rájes gitta akademalaš birrasiid rádjái., ávžžuha stáhtaráđđi Bjarne Håkon Hanssen.

Gollegiella geigejuvvui vuosttaš geardde jagis 2004 ja juhkkojuvvui dalle guovtti vuoitái,

Ella Holm Bullii su barggu ovddas oarjelsámegiela ovddidemiin ja Anársámi searvái anársámegiela ovddideami barggu ovddas.

Buohkat geain leat evttohusat, bovdejuvvojit sáddet daid árvvoštallanlávdegoddái ovdal geassemánu 12. beaivvi 2006. Evttohusa ákkastallan galgá leat vuollel 2 siiddu guhku, ja sáddejuvvo čálalaččat deike:

Gollegiella – Árvvoštallanlávdegotti jođiheaddji
Inger Marie Gaup Eira
Ávžžiluodda 9
N-9520 Guovdageaidnu

E-poasta: imge@same.net