Golbma ođđa Sámi ofelačča leat almmuhuvvon. Dat dahkkui Skiipagura festiválas. Sii leat Mats Jonas Pavall (20) Fuosskus, Anne Silja Turi (20) Divttasvuonas, ja Elle Sofe Henriksen (22) Guovdageainnus. Ofelaččaid almmuheigga Stáhtačálli Berit Oskal Eira (BSD) ja Rektor Mai Britt Utsi (Sámi allaskuvla).

Ofelaččaid bargun lea addit dieđuid ja rievdadit miellaguottuid sámi kultuvrra hárrái. Sii galget johtit joatkkaskuvllaid mielde miehtá riikka ja addit dieđuid sámi kultuvrras, historjjás ja servodatdiliin. Ovdalgo sii vulget gosage mátkái, de sii vázzet kurssa Sámi allaskuvllas. Kurssa gohčoda allaskuvla ”Formidling av samisk kultur og samfunn” (15 oč). Dát kursa lea rabas buot studeanttaide.

Sámi allaskuvla oaivvilda dán golbmasa geaid válljejedje ofelažžan leat heivvolaš ja hutkkás joavkun. Sis lea olu váikkuheapmi das movt prošeakta ovdána das ahte sámi nuorat eará nuoraide muitalit dieđuid sámi servodatdiliid birra. Kandidáhtaid válljemis leat deattuhan persovnnalaš iešvuođaid, máhtu, gaskkustandáiddu, hutkáivuođa ja beroštumi. Dasalassin leat mii deattuhan joavkku ollislašvuođa.

Mats Jonas Pavall lea bajásšaddan boazosámibearrašis Bihtánsámi guovllus. Son lea lohkan Servodatdieđu NTNU:s, muhto váldá bottu stuđeremis. Anne Silja Turi lea leamaš lonohallanstudeantan USA:s ja leamaš geassebarggus sámi radiojournálistan. Elle Sofe Henriksen lea hui aiddo ožžon Bachelorgráda dáláigge-dánssas Londonis.

”Sámi ofelaš-”prošeakta álggahuvvui jagis 2004 dalá Gielda- ja guovlodepartemeanttas (dál lea Bargo- ja searvadahttindepartemeanta). Prošeakta bistá 2007' geassái. Loga ofelaččaid beaivegirjjiid ja prošeavtta duogáža neahtas: www.samiskeveivisere.no. Váldde oktavuođa minguin e-poasttas, samiskeveivisere@samiskhs.no ja diŋgo boahtit din skuvlii.

Gulahallanolbmot:
Martin Schjøllert Fredheim
Diehtojuohkin ráđđeaddi
Bargo- ja searvadahttindepartemeanta
Tlf. 47 25 36 06

Sissel Ann Mikkelsen, prošeaktajođiheaddji
Sámi allaskuvla / Samisk høgskole
9520 Guovdageaidnu/ Kautokeino
tlf: 78 48 77 28 / 48 19 89 29
e-poasta: sissel.mikkelsen@samiskhs.no