Kulturministtar almmuha ođđa lohkanhállostrategiija

– Go girjji rahpá, de orru dego rahpame uvssa ođđa máilbmái. Lohkan guoimmuha, lea dego ája mii addá persovnnalaš ovdáneami ja lea čielga illun. Go lohká, de beassá searvat almmolaš digaštallamii. Dat lea demokráhtalaš dahku. Danin mii dárbbašit lohkat, dadjá kulturministtar Hadia Tajik.

Lohkanhállostrategiija 2013  (.pdf dárogiella) ja Almmuhus: prošeaktaruđat ovddidit lohkanhálu

Ráđđehus almmuha lohkanhállostrategiija mas mánát ja nuorat leat guovddáš ulbmiljoavku. Lohkanhállostrategiija mihttu lea ovddidit lohkama ja lohkanhálu, ja sihkkarastit mánáide ja nuoraide girjjálašvuođa olamuddui.

Lohkanhállostrategiijas leat buorit ovdamearkadoaimmat ja -prošeavttat. Mii namuhit dáid prošeavttaid nu ahte suohkanat ja ásahusat movttáskit álggahit dahje nannet prošeavttaid mat juo leat lohkanhálu ovddideapmái.

Kulturdepartemeanta geavaha 2,75 miljon kruvnno 2013:s doaimmaide mat ovddidit mánáid ja nuoraid lohkanhálu.  Dáin ruđain almmuha Kulturdepartemeanta 1,2 miljon kruvnno lohkanhálloprošektii  2013. Organisašuvnnat ožžot ohcat ruđaid prošeavttaide main mihttu lea ovddidit mánáid ja nuoraid lohkanhálu.

Lohkanhálloprošeakta Hat-trick oažžu 850 000 kr 2013. Prošeakta searvada ollugiid ja dan oamasta Foreningen !les, mas lea girjjálašvuohta ja gaskkusteapmi spábbačiekčama arenain. Prošeakta čájeha spábbačiekčanbirrasis buriid ovdagovaid geat lohket viššalit.

Prošeakta Bok til alle-bibliotek oažžu 700 000 kr 2013. Prošeavttas geatnegahttojuvvo girjerájus gaskkustit girjjálašvuođa olbmuide geaidda lea váttis lohkat. Doaibma geasuha ja dahká ahte buohkat – beroškeahttá lohkannávccain – besset lohkat.

Dát ruđat bohtet lassin dan 17 miljon kr maid Našunálgirjerájus lea ožžon prošeavttaide ja ovddidandoaimmaide girjerájussuorggis.